Bumrah Comeback: బుమ్రా వచ్చేశాడు.. టీమిండియా కెప్టెన్‌గా స్టార్ పేస్ బౌలర్

Bumrah Comeback: టీమిండియా స్టార్ పేస్ బౌలర్ జస్‌ప్రీత్ బుమ్రా తిరిగి వచ్చేశాడు. అది కూడా ఏకంగా కెప్టెన్ గా కావడం విశేషం. వెన్ను గాయం కారణంగా గతేడాది సెప్టెంబర్ నుంచి టీమ్ కు దూరంగా ఉన్న బుమ్రా.. ఇప్పుడు పూర్తి ఫిట్‌నెస్ సాధించి ఐర్లాండ్ తో జరగబోయే టీ20 సిరీస్ కు కెప్టెన్ అయ్యాడు. ఈ సిరీస్ కోసం పూర్తి యువ జట్టును సెలక్టర్లు ఎంపిక చేశారు.

ఈ టీమ్ కు బుమ్రా కెప్టెన్ కాగా.. రుతురాజ్ గైక్వాడ్ వైస్ కెప్టెన్. వెన్ను గాయానికి సర్జరీ తర్వాత కొంతకాలంగా నేషనల్ క్రికెట్ అకాడెమీలో బుమ్రా ప్రాక్టీస్ చేస్తున్నాడు. ఈ మధ్యే పూర్తి ఫిట్‌నెస్ తో బుమ్రా నెట్స్ లో బౌలింగ్ చేసిన వీడియో కూడా బయటకు వచ్చింది. కెప్టెన్ రోహిత్, బీసీసీఐ సెక్రటరీ జై షా కూడా బుమ్రా పూర్తి ఫిట్‌గా ఉన్నాడన్న సమాచారం ఇచ్చారు. మొత్తానికి 11 నెలల గ్యాప్ తర్వాత బుమ్రా మళ్లీ ఇండియన్ టీమ్ లో అడుగుపెట్టాడు.

రింకు, జితేశ్‌లకూ ఛాన్స్

ఊహించినట్లే ఐర్లాండ్ సిరీస్ కు సీనియర్లను పూర్తిగా పక్కన పెట్టారు సెలక్టర్లు. ఐపీఎల్ స్టార్లతో జట్టును నింపేశారు. కోల్‌కతా నైట్ రైడర్స్ తరఫున మెరుపులు మెరిపించిన రింకు సింగ్.. తొలిసారి ఇండియన్ టీమ్ కు ఎంపిక కావడం విశేషం. అతనితోపాటు యువ వికెట్ కీపర్ జితేశ్ శర్మకు కూడా సెలక్టర్లు అవకాశం కల్పించారు.

ఏషియన్ గేమ్స్ లో టీమిండియాకు కెప్టెన్ గా ఉన్న రుతురాజ్ గైక్వాడ్ కే ఐర్లాండ్ సిరీస్ లోనూ కెప్టెన్సీ ఇవ్వాలని సెలక్టర్లు భావించినా.. బుమ్రా కెప్టెన్సీపై ఆసక్తి కనబరిచినట్లు ఈఎస్పీఎన్‌క్రికిన్ఫో రిపోర్టు వెల్లడించింది. గతేడాది ఇంగ్లండ్ లో ఇండియా ఆడిన చివరి టెస్టులో రోహిత్ అందుబాటులో లేకపోవడంతో బుమ్రా కెప్టెన్సీ వహించిన విషయం తెలిసిందే. ఏడాది తర్వాత కెప్టెన్ గా బుమ్రా తిరిగి వచ్చాడు.

ఐర్లాండ్ సిరీస్ కు టీమిండియా

జస్‌ప్రీత్ బుమ్రా (కెప్టెన్), రుతురాజ్ గైక్వాడ్ (వైస్ కెప్టెన్), యశస్వి జైస్వాల్, తిలక్ వర్మ, రింకు సింగ్, సంజూ శాంసన్, జితేశ్ శర్మ, శివమ్ దూబె, వాషింగ్టన్ సుందర్, షాబాజ్ అహ్మద్, రవి బిష్ణోయ్, ప్రసిద్ధ్ కృష్ణ, అర్ష్‌దీప్ సింగ్, ముకేశ్ కుమార్, అవేష్ ఖాన్