Saphala Ekadashi: సకల పాపాలు తొలగించే సఫల ఏకాదశి.. ఎప్పుడు వస్తుంది? ఆ రోజు ఏం చేస్తే శుభం కలుగుతుంది?

హిందూ ధర్మం ప్రకారం ఏకాదశి తిథికి ప్రత్యేక ప్రాముఖ్యత ఉంటుంది. ఈ రోజు శ్రీమహావిష్ణువును ఆరాధించడం వల్ల జీవితంలో సంతోషం, ఐశ్వర్యం, శాంతి కలుగుతాయని నమ్మిక. అయితే ఏకాదశి తిథుల్లో మార్గశిర మాసం కృష్ణ పక్షంలో వచ్చే ఏకాదశికి మరింత విశిష్టత ఉంటుంది. దీన్ని సఫల ఏకాదశిగా పిలుస్తారు. సఫల అంటే అభివృద్ధి, ఫలించడం అని అర్థం. జీవితంలో ఆనందం, విజయం, ధనాన్ని అభివృద్ధి చేసుకునేందుకు ఇది అత్యంత పవిత్రమైన, శక్తివంతమైన రోజుగా భావిస్తారు. హిందూ నమ్మకాల ప్రకారం.. ఈ రోజు శ్రీహరినీ, లక్ష్మీ దేవినీ, శ్రీ కృష్ణుడిని పూజించడం వల్ల భక్తులకు శాంతి, ఆరోగ్యం, ధనం, శుభం కలుగుతాయి. సకల పాపాలు తొలగిపోతాయి. శరీర సంబంధిత వ్యాధులు, మానసిక ఒత్తిళ్ళు తొలగిపోతాయని నమ్మిక. పురాణాల ప్రకారం సఫల ఏకాదశి నాడు ఉపవాసం ఉంటే జీవితంలోని బాధలు తొలగిపోతాయి. సఫల ఏకాదశి తేదీ, శుభ సమయం, పూజావిధానం, ఉపవాస సమయాలను తెలుసుకుందాం.

సఫల ఏకాదశి ఎప్పుడు?

పంచాంగం ప్రకారం ఈ ఏడాది సఫల ఏకాదశి తిథి డిసెంబర్ 25వ తేదీ రాత్రి 10.29 గంటలకు ప్రారంభమవుతుంది. మరుసటి రోజు అంటే డిసెంబర్ 27వ తేదీ మధ్యాహ్నం 12:43 గంటలకు ముగుస్తుంది. సూర్యోదయ తిథిని పాటిస్తారు కనుక డిసెంబర్ 26 తేదీన సఫల ఏకాదశి పండుగను జరుపుకోవాలి.

ఏకాదశి శుభ ముహూర్తం:

తిథి ప్రారంభం - 25, డిసెంబర్, 2024 రాత్రి 10:29 గంటలకు

ఏకాదశి తిథి ముగింపు - 27, డిసెంబర్ 2024 ఉదయం 12:43 గంటలకు

పరాణ సమయం (ఉపవాసాన్ని విచ్ఛిన్నం చేసే) సమయం - ఏకాదశి రోజున ఉపవాసం చేసేవారు మరసటి రోజు సూర్యోదయం తర్వాత అంటే 27, డిసెంబర్(ద్వాదశి రోజున) ఉదయం 7:12 గంటల నుంచి 9:16 గంటల మధ్య ఉపవాసాన్ని విరమించుకోవచ్చు.

సఫల ఏకాదశి ప్రాముఖ్యత

బ్రహ్మాండ పురాణం ప్రకారం ధర్మరాజు శ్రీకృష్ణుడి మధ్య సఫల ఏకాదశి గురించి సంభాషణ జరిగించి. దాని ప్రకారం.. 100 రాజసూయ యాగాలు, 1000 అశ్వమేథ యాగాలు చేస్తే ఎంత ఫలితం కలుగుతుందో సఫల ఏకాదశి రోజున ఉపవాసం చేసి భక్తితో విష్ణువును ఆరాధిస్తే అంత శుభం కలుగుతుంది. సఫల ఏకాదశి రోజు చేసే పూజలు జీవితంలోని అన్ని కష్టాలను, దురదృష్టాన్ని దూరం చేసి సంతోషాన్ని, అదృష్టాన్ని తెచ్చిపెడతాయి. భక్తులు కోరుకున్న కోరికలు, కన్న కలలు నెరవేరేందుకు కావలసిన శక్తులు అందుతాయని విశ్వాసం.

సఫల ఏకాదశి రోజు పాటించాల్సిన ఆచారాలు..

• ఈ రోజు తెల్లవారు జామున తలస్నానం చేసి శుభ్రమైన వస్త్రాలు ధరించి శ్రీమహా విష్ణువు ఆరాధనలో భాగంగా కఠిన ఉపవాస దీక్ష చేపట్టాలి.
• కఠిన ఉపవాసం ఉండలేని వ్యక్తులు పాక్షిక ఉపవాసం అంటే సగం ఒక్క పూట భోజనం చేయవచ్చు. అది కూడా సాత్విక ఆహారాన్ని మాత్రమే తీసుకోవాలి.
• ఉదయం, సాయంత్రం శ్రీమహావిష్ణువును ఇంట్లో లేదా ఆలయంలో పూజించవచ్చు. ఎక్కడ పూజించుకున్నా ఆయనకు ఎంతో ఇష్టమైన తులసి ఆకులను సమర్పించడం మర్చిపోవదదు. విష్ణువుకు తులసి ఆకులను సమర్పించడం వల్ల వ్యక్తి చేసిన పాపాలన్నీ తొలగిపోతాయని నమ్మిక.
• ఉదయం సాయంత్రం దేవుడికి దీపం పెట్టి ధూప, ధీప, నైవేద్యాలు, తమలపాకులు, ఇతర సుగంధ వస్తువులను సమర్పించి విష్ణమూర్తిని ఆరాధించాలి. ఈ రోజు విష్ణుమూర్తిని పూజించడం వల్ల లక్ష్మీ కటాక్షం కూడా సిద్ధిస్తుందని విశ్వాసం.
• సఫల ఏకాదశి వ్రతాన్ని ఆచరించే వాళ్లు రాత్రంతా నిద్రపోకూడదు. విష్ణుమూర్తి ఆరాధనలో భాగంగా ప్రసిద్ధ కథలు, శ్లోకాలు, మంత్రాలను పఠించాలి. భజనలు, కీర్తనలు వినాలి.
• సఫల ఏకాదశి రోజున బ్రాహ్మణుడు లేదా పేదవారికి ఆహారం, బట్టలు, డబ్బు వంటి కనీస, నీత్య అవసర వస్తువులను దానం చేయడం మరిన్ని శుభఫలితాలను కలిగిస్తుంది.

గమనిక : ఈ కథనంలో మీకు అందించిన సమాచారం, సూచనలు పూర్తిగా నిజమైనది, ఖచ్చితమైనది అని మేము చెప్పలేము. నిపుణుల సూచనల ప్రకారమే మేము ఈ సమాచారాన్ని అందిస్తున్నాం. వీటిని పాటించే ముందు ఖచ్చితంగా సంబంధిత రంగంలోని నిపుణుల సలహా తీసుకోవడం మంచిది.