Gobbillu: సంక్రాతి పండుగకు ముందు ఎందుకు గొబ్బెమ్మలను పెట్టి పూజిస్తారు, ఎవరు పూజించాలి? పూజా విధానం, గొబ్బెమ్మ పాటలు..

హిందువులు జరుపుకునే ముఖ్యమైన పండగల్లో సంక్రాంతి పండుగ ఒకటి. సంక్రాంతిని పెద్ద పండుగ అని కూడా అంటారు. సంక్రాంతి ముందు రోజున భోగి పండుగ చేస్తారు. భోగి నాడు మంటలు కూడా వేస్తూ ఉంటాం. అయితే, చాలామందిలో ఉండే సందేహం ఏంటంటే ఎందుకు భోగి నాడు ధనుర్మాసంలో గొబ్బెళ్లను పెడతారు?. గొబ్బిళ్ళను పెట్టడం వలన ఏం జరుగుతుంది?, ఎందుకు ఈ ఆచారాన్ని పాటించాలి అనే సందేహాలు ఉన్నాయి.

ఇప్పుడు గొబ్బిళ్ళను ఎందుకు పెట్టాలి, ఎలా పెట్టాలి, దాని వలన ఎలాంటి లాభాలు అని పొందవచ్చు అనే విషయాల గురించి ఇప్పుడు చూద్దాం. సంక్రాంతి పండుగ రావడానికి నెల రోజులు ముందే అంటే ధనుర్మాసం ప్రారంభంలోనే గొబ్బిళ్ళను పెడతారు. రంగురంగులతో ముగ్గులు వేసి వాటిపై గొబ్బిళ్ళు పెట్టి గుమ్మడి, బంతి, చామంతి పూలతో అందంగా వాటిని అలంకరిస్తారు.

పసుపు, కుంకుమలతో గౌరీదేవిని పెట్టి పూజలు చేస్తారు. భోగినాడు సాయంత్రం కన్నెపిల్లలు గొబ్బిళ్ళ చుట్టూ తిరుగుతూ పాటలు కూడా పాడుతారు. శ్రీకృష్ణుడు చుట్టూ గోపికలు ఎలా అయితే చేరి పాటలు పాడి సరదాగా నృత్యాలు చేస్తారో,, అలాగే గొబ్బిళ్ళ చుట్టూ కూడా చేరి పాటలు పాడుతారు.

ఎప్పుడు గొబ్బిళ్లు పెట్టుకోవాలి?

సూర్యుడు వృశ్చిక రాశి నుంచి ధనస్సు రాశిలోకి ప్రవేశించిన నాడు అంటే ధనుర్మాసం మొదలైన రోజు నుంచి కూడా గొబ్బిళ్ళను పెట్టుకోవచ్చు. ఈరోజుల్లో చాలా మంది నెల రోజులు పాటు ఇలా చేయలేమని.. పండుగకు నాలుగైదు రోజులు ముందు నుంచి గొబ్బెళ్లను పెట్టడం మొదలుపెట్టారు. కానీ నిజానికి 30 రోజులు పాటు కూడా గొబ్బెమ్మలు పెట్టి రోజూ పూజలు చేయవచ్చు.

గొబ్బిళ్ళను పెట్టడం వలన చాలా ఉపయోగాలు అయితే ఉన్నాయి. గొబ్బెమ్మలని పెట్టడం వలన సూక్ష్మ క్రమంలో ఇంట్లోకి రావు. వాతావరణం లో వచ్చే మార్పులకి అనుగుణంగా మనం భోగి మంటని వేస్తాము. దుఃఖ కాలం అయిపోయిందని రాబోయే రోజులు మంచివేనని భోగి మంటలు వేస్తాము.

ఆ రోజుతో ఇబ్బందులన్నీ తొలగిపోయి రాబోయే రోజుల్లో కొత్త పంటలతో కొత్త అల్లుళ్లతో సంతోషంగా గడపాలని ఇలా భోగి మంట వేసి పాత సామాన్లు వంటివి కాలుస్తూ ఉంటాము. ధనుర్మాసం మొదలు భోగి వరకు మనం పెట్టిన గొబ్బెమ్మలను పిడకల కింద చేసి ఆ మంటల్లో వేస్తాము.

గొబ్బిళ్ళ పూజ ఎలా చేయాలి?

ఆవు పేడతో ఐదు ముద్దలు చేసి, ఒక పీట మీద నాలుగు వైపులా నాలుగు మధ్యలో ఒకటి పెట్టాలి. వీటి కంటే చిన్నవి ఇంకో ఐదు ముద్దలు చేసి పెద్దవాని పైన పెట్టాలి. తర్వాత ఇంకో చిన్న ముద్ద చేసి మధ్యలో ఉన్న ముద్ద పైన పెట్టాలి. ఈ మొత్తం కలిపి పదకొండు గొబ్బెమ్మలు అవుతాయి.

వాటిపై బియ్యం పిండితో ముగ్గు పెట్టాలి. పసుపు, కుంకుమ, గుమ్మడి, బంతి, చామంతి మొదలైన పూలతో వీటిని అలంకరించాలి. ఆ పీటని ఇంటి బయట పెట్టి పిల్లల్ని నాలుగువైపులా కూర్చోబెట్టి లక్ష్మీదేవిని ఆహ్వానించి అష్టోత్తరంతో పూజలు చేయాలి.

కొబ్బరికాయ, పండ్లు నైవేద్యంగా పెట్టాలి. తర్వాత గొబ్బెమ్మల చుట్టూ పిల్లలు తిరుగుతూ భజన చేయాలి. కోలాటం కూడా చేయొచ్చు.

కృష్ణుని మీద పాటలు, గొబ్బెమ్మ పాటలు, దేవతామూర్తులు పాటలు పాడుతూ ఆనందంగా పిల్లలు గడుపుతారు.

గొబ్బిళ్ళ పాట

మొక్క మొక్క మొలచిందంట ఏమి యొక్క మొలచిందంట రాజుగారి తోటలోన జామమొక్క మొలచిందంట ఆనాటి అక్కల్లార చంద్రగిరి భామల్లార గొబ్బియల్లో గొబ్బియల్లో

పువ్వు పువ్వు పూసిందట ఏమి పువ్వు పూసిందంట రాజుగారి తోటలోన జామపువ్వు పూసిందంట ఆనాటి అక్కల్లార చంద్రగిరి భామల్లార గొబ్బియల్లో గొబ్బియల్లో

పిందె పిందె వేసిందంట ఏమి పిందె వేసిందంట రాజుగారి తోటలోన జామపిందె వేసిందంట రాజుగారి తోటలోన జామ పిందె వేసిందట ఆనాటి అక్కల్లార చంద్రగిరి భామల్లార గొబ్బియల్లో గొబ్బియల్లో

పండుపండు కాసిందంట ఏమి పండుకాసిందంట రాజుగారి తోటలోన జామపండు కాసిందంట. ఆనాటి అక్కల్లార చంద్రగిరి భామల్లార గొబ్బియల్లో గొబ్బియల్లో..

గమనిక : ఈ కథనంలో మీకు అందించిన సమాచారం, సూచనలు పూర్తిగా నిజమైనది, ఖచ్చితమైనది అని మేము చెప్పలేము. నిపుణుల సూచనల ప్రకారమే మేము ఈ సమాచారాన్ని అందిస్తున్నాం. వీటిని పాటించే ముందు ఖచ్చితంగా సంబంధిత రంగంలోని నిపుణుల సలహా తీసుకోవడం మంచిది.