నవంబర్ 9 నుంచి హైదరాబాద్ లో కోటి దీపోత్సవం వేడుకకు సర్వం సిద్ధం

ప్రతి ఏడాది ఎన్టీవీ, భక్తి టీవీ అత్యంత వైభవంగా నిర్వహించే కోటి దీపోత్సవానికి సర్వం సిద్ధం అయింది. ప్రతీ ఏటా నిర్వహించే ఈ కోటి దీపోత్సవాన్ని 2012లో శృంగేరి పీఠాధిపతి జగద్గురు భారతీ తీర్థ మహాస్వామి ప్రారంభించారు. అప్పటి నుంచి ఈ కార్యక్రమం నిర్విరామంగా ప్రతి ఏడాది జరుగుతూనే ఉంది.

భక్తి టీవీ, ఎన్టీవీ ఆధ్వర్యంలో 17 రోజుల పాటు ఈ కోటి దీపోత్సవం మహా వైభవంగా జరగనుంది. నవంబర్ 9వ తేదీ నుంచి 25వ తేదీ వరకు ఈ కోటి దీపోత్సవం అత్యంత భక్తి శ్రద్ధలతో నిర్వహించేందుకు అంతా సిద్ధమైంది. ప్రవచనంతో మొదలై ప్రత్యేక అర్చనలు, దేవదేవుల కల్యాణ మహోత్సవాలు, నీరాజనాలతో ఈ కోటి దీపోత్సవంలో భక్తులు పులకించిపోతారు. ఇక ఉత్సవ విగ్రహాల ఊరేగింపు కోటి దీపోత్సవంలో ఓ మహాజ్వల ఘట్టం అనే చెప్పాలి.

ఈ కోటి దీపోత్సవంలో ప్రముఖ పుణ్యక్షేత్రాల దేవాతామూర్తులను చూసి భక్త కోటి పులకించిపోయే అద్భుత దృశ్యం ప్రతి ఏడాది లాగే ఈ ఏడాది కూడా కనువిందు చేయనుంది. కోటి దీపోత్సవం అంటే కేవలం దీపాలను వెలిగించడం మాత్రమే కాదు కూర్చున్న చోటు నుంచే మహాదేవునికి జరిగే సహస్ర కలశాభిషేకాన్ని కనులారా వీక్షించవచ్చు. శివలింగానికి స్వయంగా రుద్రాక్షలు, భస్మంతో అభిషేకం చేసే అవకాశాన్ని కూడా నిర్వాహకులే కల్పిస్తూ ఉండటం గమనార్హం. అలాగే దేవతల కల్యాణాన్ని చేయించినా, వీక్షించినా మహా పుణ్యప్రదమని అంటారు.

ఈ రెండు అదృష్టాలు ఒకేసారి వీక్షించే భాగ్యం భక్తి టీవీ కోటి దీపోత్సవం ద్వారా కలుగుతాయి. అంతే కాదు ఒకే వేదికపై శివకేశవులను కోటి దీపాల మధ్య దర్శించుకునే మహా యోగమే కోటి దీపోత్సవం. ప్రవచనామృతాలు, కళ్యాణ కమనీయాలు, వెలుగులీనే దీపాంతపులతో కోటి దీపోత్సవం అంగరంగ వైభవంగా జరగనుంది. హైదరాబాద్ లోని ఎన్టీఆర్ స్టేడియంలో ప్రతిరోజు సాయంత్రం ఐదున్నర గంటల నుంచి ఈ క్రతువు మొదలుకానుంది.