Nagulachavithi: తెలుగువారికి నాగులచవితి ఎందుకు ముఖ్యమైన పండుగ? నాగులచవితి విశిష్టత ఏమిటి?-know importance of nagula chavithi and its prominence ,రాశి ఫలాలు న్యూస్
తెలుగు న్యూస్  /  రాశి ఫలాలు  /  Nagulachavithi: తెలుగువారికి నాగులచవితి ఎందుకు ముఖ్యమైన పండుగ? నాగులచవితి విశిష్టత ఏమిటి?

Nagulachavithi: తెలుగువారికి నాగులచవితి ఎందుకు ముఖ్యమైన పండుగ? నాగులచవితి విశిష్టత ఏమిటి?

Koutik Pranaya Sree HT Telugu
Nov 16, 2023 03:00 PM IST

Nagulachavithi: కార్తీక మాసంలో వచ్చే శుక్ల పక్ష చవితి నాడు నాగుల చవితి జరుపుకుంటారు. ఈ పండగకున్న వృత్తాంతం, విశిష్టత వివరంగా తెలుసుకోండి.

నాగుల చవితి విశిష్టత, పురాణ కథ
నాగుల చవితి విశిష్టత, పురాణ కథ (pixabay)

కార్తీక మాసంలో శుక్ల పక్ష చవితినాడు నాగులచవితి పర్వదినంగా జరుపుకుంటారు. పురాణేతిహాసాలలో నాగజాతికి ఒక విశిష్ట స్థానం ఉంది. విష్ణుమూర్తి నాగులను తన శయ్యగా మార్చుకున్నాడు. శివుడు నాగులను తన ఆభరణాలుగా చేసుకున్నాడు. విఘ్నేశ్వరుడు నాగులను తన యజ్ఞోపవీతంగా చేసుకున్నాడు. ఎనభై లక్షల జీవరాశులలో ఒకజాతి నాగజాతి. ఆ జాతి గాలిని ఆహారంగా తీసుకుని బహుకాలం జీవిస్తుంది. నాగులు రజోస్వభావం కలిగినవి. వాటికి క్రోధం ఎక్కువ. చూసిగాని, చూడక గాని నాగుల తోకమీద కాలు వేస్తే వెంటనే అవి కాటేస్తాయి. అందువలన నాగులు అంటే విపరీతమైన భయం. విషభరితమైన నాగులను ఆరాధిస్తే వాటి వలన భయం ఉండదని ప్రజల విశ్వాసం. ఆ విశ్వాసమే నాగారాధనకు కారణమయిందని విజ్ఞులు చెబుతారు.

నాగుల చవితి పూజ:

ప్రజలకు, నాగులకు విడిపోని చెలిమి ఉంది. క్రూరప్రాణి అయిన నాగులను ఆస్తులుగా భావించి పాటలు పాడుకుంటుంటారు. వాటికి సలహాలు కూడా ఇస్తుంటారు. నైవేద్యం పెడతారు. నాగులు పుట్టలలో నివసిస్తాయి. కార్తీక శుద్ధ చవితినాడు ఉదయాన్నే లేచి స్నానాదికాలు ముగించి పూజకు సిద్ధమవుతారు. నాగ ప్రతిమ లేదా గోడపై నాగ ఆకారాన్ని చిత్రించి పూజిస్తారు. తరువాత పుట్ట ఉన్న ప్రాంతానికి వెళతారు. పుట్టలో పాలు పోసి నాగులకు చలిమిడి, నువ్వుల ఉండలు నైవేద్యంగా పెడతారు. పుట్టమట్టిని కొంచెం తీసుకుని చెవులకు పెట్టుకుంటారు. ఆ మట్టిని పుట్టబంగారం అనే గొప్ప పేరుతో పిలుస్తారు. సాధారణంగా పుట్టలలో నాగులుంటాయని భావిస్తారు. పుట్టల అడుగు భాగాన చాలా దూరం వరకు సొరంగమార్గం ఉంటుంది. ఆ మార్గంలోనే నాగులుంటాయి. మహిళలు పుట్టలలో పాలుపోయడం వలన అక్కడ ప్రాంతం చల్లగా మారిపోతుంది. ఆహారాన్ని అన్వేషించుకుంటూ అక్కడికి వచ్చిన ఎలుకలు, కప్పలు నాగులకు ఆహారమవుతాయి అని పెద్దల మాట.

పూజ అయిపోయి ఇంటికి తిరిగి వచ్చిన తర్వాత ఆ రోజంతా ఉపవాసముంటారు. తరగని కూరలతో ఆహార పదార్థాలను తయారుచేసి స్వామికి నివేదన చేసి ప్రసాదాన్ని భుజించినట్లయితే స్వామి అనుగ్రహం వల్ల అనారోగ్యాది బాధలు తొలగిపోతాయి. చెవికి సంబంధించిన దోషాలు తొలగిపోతాయని నమ్మిక.

నాగుల విశిష్టత:

నాగులలో అనంత, వాసుకి, శేష, పద్మనాభ, కంబల, కర్కోటక, అశ్వతార, ధృతరాష్ట్ర, శంఖపాల, కాళియ, తక్షక, పింగళ యను పన్నెండు నాగులు ముఖ్యమైనవి. నెలకొక్కరిగా ఈ పన్నెండు నాగులను అర్చించినట్లయితే అవి సంతృప్తి చెంది మానవులకు శుభాలకు కలిగిస్తాయి. ఎటువంటి అరిష్టాలు వారి దరికి చేరవు. భూమి, ఆకాశం, స్వర్గం, సూర్యకిరణం, సరోవరం, వాపీకూడ తటాకాదుల యందు సంచరించు నాగులు మమ్ములను సర్వదా కాపాడుగాక. అటువంటి నాగులకు ప్రణామాలు అంటూ నాగులను ప్రార్థించాలి. నాగులు రైతులకు నేస్తాలు. అవి భూమిమీద సంచరించేటప్పుడు జలాశయములందు, పంటపొలాలయందు తిరుగాడుతుంటాయి. పంటలను నాశనం చేసే ఎలుకలను నాగులు తమ ఆహారంగా చేసుకుంటాయి. తమ పొలాలను రక్షించు నాగులను కుటుంబ శ్రేయస్సు కోసం మహిళలు పూజిస్తుంటారు.

లింగపురాణంలో కథ:

నాగులు పుట్టుక గురించి లింగపురాణంనందు ఒక కథ ఉంది. ఈ కథనానుసారం బ్రహ్మ సృష్టి చేద్దామని సంకల్పించుకుని మహాశివుడి అనుగ్రహం కోసం తపస్సు చేయసాగాడు. చాలాకాలం గడిచిపోయింది. శివుడి అనుగ్రహం లభించలేదు. బ్రహ్మదేవుడికి అంతులేని ఆగ్రహం కలిగింది. నేత్రాలు ఎర్రగా మారిపోయాయి. గట్టిగా కళ్ళు మూసుకునేటప్పటికి కళ్ళ నుండి కన్నీరు కారి కింద పడింది. ఆ కన్నీటి బిందువులే నాగులుగా మారాయి. సంతానానికి, సర్పపూజకు సంబంధం ఉందని బ్రహ్మపురాణంలో ఒక కథ ఉంది.

పూర్వకాలంలో చంద్ర వంశానికి చెందిన శూరసేనుడు అను రాజు ఉందేవాడు. అతని రాజధాని ప్రతిష్టానపురం. శ్రీమంతుడు, మతిమంతుడు అయిన ఆ రాజు సంతానం కోసం తన సతితో కలిసి పూజలు చేశాడు. వారి పూజలు ఫలించి తుదకు వారికి ఒక నాగం పుట్టింది. ఆ నాగమును వారు పెంచారు. ఆ నాగమునకు మనషుల వలే మాట్లాడగలిగే శక్తి ఉంది. ఒకనాడు ఆ నాగం తండ్రిని తనకు ఉపనయనం గావించి వేదాభ్యాసం గావింపుమని ప్రార్థించింది. శూరసేన మహారాజు రహస్యంగా ఒక సద్రాహ్మణుని రప్పించి నాగము కోరినట్లు చేశాడు. మరికొంతకాలం గడిచిపోయింది. నాగం తనకు వివాహం జరిపించమని అడిగింది. ఆ కోరికను విన్న రాజు విస్మితుడైనాడు. పూర్వదేశమును పరిపాలిస్తున్న విజయుడను భూపతి చెల్లెలు భోగవతి తగిన కన్యయని భావించి ఖడ్గాన్ని పంపించగా విజయుడు వీరస్థానమున ఆ ఖద్దము నుంచి భోగవతీ పరిణయము జరిపించాడు. సకల లాంఛనాలతో తన సోదరిని అత్తవారింటికి పంపించాడు. అత్తవారింటికి వచ్చిన తరువాత భోగవతికి తన భర్త ఒక సర్పమని అత్తగారి తెలుసుకుంది. కంగారుపడక అత్తగారితో ఇలా అంది. సాధారణంగా మానవు, మానవతులకు మానవులే భర్తలు అవుతారు.

పరమేశ్వరుని శాపం:

నా పుణ్యవశాన నాకు దేవమూర్తి భర్తగా లభించాడు. తర్వాత భర్రయున్న గదిలోకి వెళ్ళింది భర్తను చూచి నాథా! నేను దేవపల్సినైతిని. నీచే నిట్లనుగ్రహింపబడి ధన్యురాలనయితిని అని పలికి నాగముతో కలసి విహరించసాగింది. కొంతకాలానికి ఆ నాగమునకు పూర్వజ్ఞానం కలిగింది. ఒకనాటి రాత్రి ఆ నాగము తన సతి భోగవతిని అడిగింది. నేను నాగమును కదా! నన్ను చూచి నీవు ఎందుకు భయపడడం లేదు. అప్పుడు భోగవతి నాథా! దేవ వివాహితములగు సంఘటన తప్పించుకొనుట ఎవరి తరము. భర్త ఎటువంటి వాడైనా స్త్రీకి దైవసమానుడు. దైవసముణ్ణి చూచి భయపడడం దేనికి అని సమాధానమిచ్చింది. భార్య మాటలకు సంతోషించిన నాగము భోగవతితో ఇలా ఉన్నది. నాకు పూర్వ స్మృతి కలిగింది. నేను పరమేశ్చ్వరునిచే శపింపబడినవాడను. శేషపుత్రుదైన నేను శివునికి ఆభరణముగానుంటిని. అపుడు కూడా నీవేనా భార్యవు.

ఒకనాడు శివుడు పార్వతితో సరససల్లాపములాడుతూ నవ్వసాగాడు. అతని సన్నిధానముననున్న నేనును భయం లేకుండా నవ్వసాగాను. అది చూసి శివుడు కోపితుడై నన్ను మానవగర్భమున నాగమువై జన్మింపుమని శపించాడు. నేను జరిగిన తప్పిదమును మన్నించి శాపవిమోచనం కొరకు ప్రార్థించగా శివుడు కరుణించి నీవు నీ పత్నితో కలసి గౌతమి నదిలో స్నానమాచరించి నన్ను ప్రార్ధిస్తే నీకు శాపవిమోచనం కలుగుతుంది అని చెప్పి అనుగ్రహించాడు. ఆ నాగము తన సతి భోగవతితో కలసి గౌతమి నదిలో స్నానమాచరించి శివుడిని ఆరాధించాడు. శివుడు ప్రసన్నుడై నాగమునకు దివ్యస్వరూపాన్ని ప్రసాదించాడు. పిదప తల్లిదండ్రుల వద్దకు వచ్చి, జరిగిన వృత్తాంతమంతా తెలిపి శివలోకమునకు వెళ్ళుటకు అనుమతినివ్వమని ప్రార్ధించాడు. శూరసేన మహారాజు అంతా విని ఇలా అన్నాడు.

వత్సా! నీకు మాకు ఏకైక పుత్రుడవు. ఈ రాజ్యం నీది. నీవు రాజ్యపాలన గావింపుము. మా తదనంతరము నీవు శివలోకమునకేగుము అని పలుకగా, నాగేశ్వరుడు తండ్రి మాటలకు తలొగ్గి రాజ్యపాలన గావిస్తూ పుత్రవంతుడై రాజ్యపాలన చేసి, అనంతర కాలంలో రాజ్యాన్ని పుత్రులకొసగి సతీసమేతంగా శివలోకానికి వెళ్ళాడు. నాగము పడగ అదృష్టవంతులకు మాత్రమే లభిస్తుందని చెబుతుంటారు. తిమ్మరుసు కథ అందరికీ తెలిసిందే కదా! నాగుల మహిమ అనంతమైనది. నాగులను అర్చించడం వల్ల సంతానాన్ని అభిలాషించే వారికి గర్భదోషములు తొలగిపోయి సత్సంతానం కలుగుతుంది. సంతతి ఉన్నవారికి అభివృద్ధి కలుగుతుంది. నాగదోషములు తొలగిపోతాయి. ఎటువంటి అరిష్టాలు కలగవు. నాగులను భక్తిప్రపత్తులతో సేవించి జీవితాలను ధన్యం చేసుకోవాలని ప్రముఖ ఆధ్యాత్మికవేత్త, పంచాంగకర్త బ్రహ్మశ్రీ చిలకమర్తి ప్రభాకర చక్రవర్తి శర్మ తెలిపారు.

WhatsApp channel