Telangana Weather Updates : తెలంగాణలో భానుడి భగభగలు - 8 జిల్లాలకు 'ఎల్లో' హెచ్చరికలు

తెలంగాణలో సూర్యుడి ప్రతాపం రోజురోజుకూ పెరుగుతోంది.  అధిక ఉష్ణోగ్రతలు, వడగాల్పులతో జనం అల్లాడిపోతున్నారు. ఉదయం 9 దాటితే చాలు… ఎండ తీవ్రత కనిపిస్తోంది. మధ్యాహ్నం వేళ బయటికి వెళ్లలేకపోతున్నారు.

ఈ ఏడాది ఫిబ్రవరి ఆరంభం నుంచే ఎండలు పెరిగాయి,  వేసవి ఆరంభంలోనే ఈస్థాయి ఎండలు ఉండటంతో… జనాలు బెంబేలెత్తిపోతున్నారు. ఈ క్రమంలోనే పలు జిల్లాల్లో అధికస్థాయిలో ఉష్ణోగ్రతలు నమోదవుతున్నాయి. 

తెలంగాణలోని చాలా ప్రాంతాల్లో 40 డిగ్రీలకు పైగా ఉష్ణోగ్రతలు నమోదవుతున్నాయి. ఈ నేపథ్యంలో హైదరాబాద్ వాతావరణ కేంద్రం హెచ్చరికలను జారీ చేసింది. రేపు(మార్చి 15) పలు జిల్లాల్లో ఎండల తీవ్రత ఎక్కువగా ఉంటుందని పేర్కొంది. 

శనివారం(మార్చి 15) ఆదిలాబాద్, ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, రాజన్న సిరిసిల్ల, పెద్దపల్లి జిల్లాల్లో వడగాల్పులు వీచే అవకాశం ఉందని హైదరాబాద్ వాతావరణ కేంద్రం తెలిపింది. ఈ జిల్లాలకు ఎల్లో హెచ్చరికలను జారీ చేసింది. 
 

ఈ ఏడాది వేసవిలో ఉష్ణోగ్రతలు పాత రికార్డులు తిరగరాసే అవకాశం ఉందని భారత వాతావరణ శాఖ అంచనా వేస్తోంది. మార్చి 15 నుంచి ఉష్ణోగ్రతలు భారీ స్థాయిలో పెరుగుతాయని వాతావరణ శాఖ పేర్కొంది. ఇప్పటికే ఏపీ, తెలంగాణలో పగటిపూట ఉష్ణోగ్రతలు పెరిగిపోతున్నాయి. తీవ్ర ఉక్కపోతతో జనం అల్లాడుతున్నారు.  

ఎండల తీవ్రత ఎక్కువగా ఉన్న నేపథ్యంలో… ప్రజలంతా జాగ్రత్తగా ఉండాలని అధికారులు హెచ్చరిస్తున్నారు. మధ్యాహ్నం వేళ బయటికి వెళ్లకపోవటం మంచిదని సూచిస్తున్నారు. డీహ్రైడేషన్ కు గురికాకుండా చూసుకోవాలని చెబుతున్నారు.