TG New Ration Cards : 'మీసేవా' కేంద్రాల వద్ద బారులు..! రేషన్ కార్డు దరఖాస్తులపై తాజా అప్డేట్ ఇదే

కొత్త రేషన్ కార్డుల జారీని తెలంగాణ ప్రభుత్వం ప్రారంభించిన సంగతి తెలిసిందే. ఆఫ్ లైన్ లోనే కాకుండా ఇటీవలే మీసేవా ఆన్ లైన్ కేంద్రాల నుంచి కూడా దరఖాస్తులను స్వీకరిస్తోంది. ఇప్పటికే ఈ సేవలు అందుబాటులోకి కూడా వచ్చాయి.

 ‘మీసేవా’ కేంద్రాల్లో రేషన్ దరఖాస్తుల ప్రక్రియ ప్రారంభం కావటంతో ప్రజలు భారీగా తరలివస్తున్నారు. దీంతో ఆయా కేంద్రాల వద్ద భారీగా రద్దీ నెలకొంది.  ఉదయం నుంచే పెద్ద ఎత్తున అక్కడికి చేరుకుంటున్న పరిస్థితులు కనిపిస్తున్నాయి.

 రేషన్‌ కార్డుల్లో మార్పులు, చేర్పులతో పాటు కొత్త కార్డుల కోసం  పెద్ద సంఖ్యలో అప్లికేషన్ చేసుకునేందుకు తరలి వస్తున్నారు. దీంతో  మీసేవా కేంద్రాలన్నీ జనాలతో కిక్కిరిసిపోతున్నాయి.

రేషన్ కార్డుల కోసం భారీగా ప్రజలు తరలివస్తుండటంతో మీసేవా సర్వర్లపై ప్రభావం పడుతోంది. కొన్నిచోట్ల సర్వర్లు కూడా మొరాయిస్తున్నాయని నిర్వాహకులు చెబుతున్నారు. దీంతో కొన్నిచోట్ల దరఖాస్తుల స్వీకరణ ప్రక్రియ ఆలస్యంగా సాగుతోంది.

మీసేవా కేంద్రాల వద్ద ప్రజలు బారులు తీరుతుండటం, సర్వర్లు మొరాయిస్తుండటంతో దరఖాస్తుదారులు టెన్షన్ పడుతున్నారు. అప్లికేషన్ల గడువు ఎక్కడ పూర్తవుతుందో అని ఆందోళన చెందుతున్నారు. ఈ నేపథ్యంలో పౌరసరఫరాల శాఖ కీలక ప్రకటన చేసింది. 

‘రేషన్‌ కార్డుల దరఖాస్తుల స్వీకరణ నిరంతర ప్రక్రియ అని పౌరసరఫరశాఖ స్పష్టం చేసింది. అప్లికేషన్ల సమర్పణకు ఎలాంటి గడువు లేదని క్లారిటీ ఇచ్చింది. దరఖాస్తుదారులు తొందరపడాల్సిన అవసరం లేదని పేర్కొంది. 

రేషన్ కార్డుల విషయంలో గందరగోళానికి గురి కావొద్దని పౌరసరఫరాల శాఖ సూచించింది. ప్రజాపాలన లేదా గ్రామసభలో దరఖాస్తు చేసిన వారు మళ్లీ చేయవద్దని తెలిపింది. 

మరోవైపు ప్రజాపాలన, గ్రామసభల ద్వారా వచ్చిన రేషన్ కార్డు దరఖాస్తులను కూడా అధికారులు పరిశీలిస్తున్నారు. ప్రభుత్వం జారీ చేసిన మార్గదర్శకాలకు అనుగుణంగా కొత్త కార్డులను జారీ చేయనున్నారు.