'రాజీవ్ యువ వికాసం'స్కీమ్ కు అప్లయ్ చేశారా..? మీ కోసమే ఈ అప్డేట్

రాజీవ్ యువ వికాసం స్కీమ్ పై తెలంగాణ సర్కార్ కసరత్తు కొనసాగుతోంది. ఇప్పటికే దరఖాస్తుల ప్రక్రియ పూర్తి కాగా… అర్హులను గుర్తించేందుకు అన్ని కోణాల్లో దరఖాస్తులను పరిశీలిస్తోంది.

అర్హుల గుర్తింపు ప్రక్రియ కొనసాగుతున్న వేళ రాష్ట్ర ఆర్థిక మంత్రి, డిప్యూటీ సీఎం భట్టి విక్రమార్క…శుక్రవారం డాక్టర్ బి.ఆర్ అంబేద్కర్ రాష్ట్ర సచివాలయంలో రాజీవ్ యువ వికాసం పథకం పై సంబంధిత ఉన్నత అధికారులతో సమీక్ష చేశారు. ఈ సందర్భంగా పలు సూచనలు ఇచ్చారు.

రాజీవ్ యువ వికాసం లబ్ధిదారుల ఎంపిక పారదర్శకంగా పూర్తి చేయాలని భట్టి విక్రమార్క అధికారులను ఆదేశించారు. నిర్దేశించుకున్న క్యాలెండర్ ప్రకారం…. రాష్ట్ర ఆవిర్భావ దినోత్సవం జూన్ 02న మంజూరు పత్రాలు పంపిణీకి సిద్ధం అయ్యేలా చూడాలని స్పష్టం చేశారు.

స్వయం ఉపాధి రుణాల మంజూరు కోసం రాయితీలపై రుణ సదుపాయం అందించేందుకు తెలంగాణ ప్రభుత్వం రాజీవ్ యువ వికాసం స్కీమ్ అమలు చేస్తోంది. ప్రతిష్టాత్మకంగా తీసుకున్న ఈ పథకానికి 16 లక్షలకుపైగా దరఖాస్తులు వచ్చాయి. భారీ సంఖ్యలో దరఖాస్తులు రావటంతో ప్రస్తుతం వీటి పరిశీలన కొనసాగుతోంది. మరికొన్ని రోజుల్లోనే ఈ ప్రక్రియను పూర్తి చేసి… లబ్ధిదారుల జాబితాను వెల్లడించే దిశగా ప్రభుత్వం అడుగులు వేస్తోంది.

మండల స్థాయిలో వెరిఫికేషన్ ప్రక్రియ పూర్తి అయిన వాటిని జిల్లా స్థాయి కమిటీకి పంపుతుతున్నారు. ఇదంతా కూడా మే 20లోపు పూర్తి చేయాలని సర్కార్ నిర్ణయించింది. ఆ తర్వాత అర్హులను గుర్తిస్తారు. మండలాల వారీగా పేర్లను వెల్లడిస్తారు.

ఈ స్కీమ్ కింద అర్హత సాధించిన వారికి జూన్ 2వ తేదీన మంజూరు పత్రాలను జారీ చేస్తారు. ఈ కార్యక్రమానికి సంబంధించిన వివరాలను ప్రభుత్వం త్వరలోనే వెల్లడించనుంది.

ఈ స్కీమ్ కింద కేటగిరీల వారీగా రాయితీ అందుతుంది. రూ. 50 వేల నుంచి రూ. 4 లక్షల వరకు రుణం పొందే ఛాన్స్ ఉంటుంది. ఇందులో కేటగిరీ-1 కింద రూ.50 వేల విలువైన యూనిట్‌కు వంద శాతం రాయితీ ఉంటుంది. బ్యాంక్ లింకేజీ లేకుండానే ఈ రుణాన్ని అమలు చేస్తారు. కానీ మిగతా కేటగిరిలో మాత్రం బ్యాంక్ లింకేజీని తప్పనిసరిగా అమలు చేయాలని ప్రభుత్వం ఇప్పటికే నిర్ణయించింది.