AP TG Weather Updates : ఐఎండీ అలర్ట్... ఈ తేదీల్లో తెలంగాణకు భారీ వర్ష సూచన, హెచ్చరికలు జారీ

తెలుగు రాష్ట్రాల్లో గత నాలుగైదు రోజులుగా ఎండల తీవ్రత ఎక్కువగా ఉంటోంది. ఓవైపు భానుడి భగభగలు పెరుగుతుండగా… మరోవైపు నైరుతి రుతుపవనాలు కూడా వేగంగా విస్తరిస్తున్నాయి.

కేరళ, తమిళనాడులో మరికొన్ని ప్రాంతాల్లోకి నైరుతి రుతుపవనాలు విస్తరించేందుకు అనుకూలమైన వాతావరణ పరిస్థితులు కొనసాగుతున్నాయని వాతావరణశాఖ విడుదల చేసిన తాజా బులెటిన్ లో పేర్కొంది.

ఇక ఇవాళ తెలంగాణ ఏపీలో తేలికపాటి నుంచి మోస్తారు వర్షాలు కురిసే అవకాశం ఉందని ఐఎండీ తెలిపింది. ఉత్తర కోస్తా, దక్షిణ కోస్తాతో పాటు రాయలసీమ జిల్లాలోని పలు ప్రాంతాల్లో పిడుగులతో కూడిన వర్షాలు కురిసే అవకాశం ఉంది. ఇదే సమయంలో రెండు మూడు రోజుల పాటు గరిష్ట ఉష్ణోగ్రతలు నమోదయ్యే అవకాశం ఉందని వెల్లడించింది.

 జూన్ 1, 2 తేదీల్లో తెలంగాణలోని  పలు జిల్లాల్లో భారీ వర్షాలు కురిసే అవకాశముందని హైదరాబాద్ వాతావరణ కేంద్రం తెలిపింది. రాజన్న సిరిసిల్ల, కరీంనగర్‌, పెద్దపల్లి, రంగారెడ్డి, వికారాబాద్‌, సంగారెడ్డి, మెదక్‌, కామారెడ్డి, మహబూబ్‌నగర్‌, నాగర్‌ కర్నూల్‌, వనపర్తి, నారాయణపేట, జోగులాంబ గద్వాల్‌ జిల్లాల్లో  అక్కడక్కడ భారీ వర్షాలు కురిసే అవకాశముందని వెల్లడించింది. ఆయా జిల్లాలకు ఎల్లో హెచ్చరికలు జారీ అయ్యాయి.

తెలంగాణ ప్రాంతంలో జూన్ 6వ తేదీ వరకు వర్షాలు కురిసే అవకాశం ఉందని హైదరాబాద్ వాతావరణ కేంద్రం అంచనా వేసింది. తేలికపాటి నుంచి మోస్తారు వర్షాలు కురిసే అవకాశం ఉందని వివరించింది.

జూన్ మొదటి వారంలోనే నైరుతు రుతుపవనాలు ఆంధ్రప్రదేశ్ లోకి ఎంట్రీ ఇచ్చే అవకాశం ఉంది. ఆ తర్వాత తెలంగాణలోకి విస్తరించే అవకాశం ఉందని వాతావరణశాఖ అంచనా వేస్తోంది.