Gandhi Govt Hospital : సంతానం లేని దంపతులకు గుడ్‌ న్యూస్‌.. ఇక గాంధీ ఆస్పత్రిలో 'IVF' సేవలు

సికింద్రాబాద్‌ గాంధీ ఆసుపత్రిలోని తల్లీపిల్లల విభాగంలోని 5వ అంతస్తులో తొలిసారిగా ఈ ఇన్‌-విట్రో-ఫెర్టిలైజేషన్‌ (ఐవీఎఫ్‌) సెంటర్ మొదలుకానుంది. ఆదివారం ఆరోగ్యశాఖ మంత్రి హరీశ్ రావు ప్రారంభించనున్నారు.

రూ.5 కోట్లతో గాంధీ దవాఖానలో సంతాన సాఫల్య కేంద్రాన్ని ఏర్పాటు చేశారు. దీంతో గాంధీ ఆసుపత్రిలో పైసా ఖర్చు లేకుండానే ఐవీఎఫ్ లో సంతానం పొందే అవకాశముంది.

మరోవైపు 2018లో గాంధీ ఆస్పత్రి సంతాన సాఫల్య సేవలు అందుబాటులోకి వచ్చాయి. కేవలం టెస్టులు, కౌన్సెలింగ్‌తోపాటు ఇంట్రాయుటెరిన్‌ ఇన్సెమినేషన్‌ (ఐయూఐ) పద్ధతిలో సంతానం పొందేలా ప్రయత్నం చేసేవారు. ఈ విధానంలో ఇప్పటికే కొందరికి సంతాన భాగ్యం దక్కింది. తాజాగా  అత్యాధునిక ఇన్‌విట్రో ఫెర్టిలైజేషన్‌(ఐవీఎఫ్‌) చికిత్సలు అందుబాటులోకి రానున్నాయి. 

తెలంగాణ ప్రభుత్వం కృషి కారణంగా గాంధీ ఆసుపత్రిలో మొట్టమొదటిసారిగా IVF (ఇన్ విట్రో ఫెర్టిలిటీ) కేంద్రాన్ని ఏర్పాటు చేయడం ఒక చారిత్రాత్మక మైలురాయిగా అభివర్ణించారు ఆరోగ్యశాఖ మంత్రి హరీశ్ రావు. ఈ మేరకు 'X'లో ఫొటోలను షేర్ చేశారు.