AP TG Weather Updates : ద్రోణి ఎఫెక్ట్..! ఏపీకి భారీ వర్ష సూచన, తెలంగాణలోని ఈ జిల్లాలకు ఎల్లో హెచ్చరికలు

వాయువ్య బంగాళాఖాతం వరకు విస్తరించిన ద్రోణి ప్రభావంతో ఏపీ తెలంగాణలో మూడు నాలుగు రోజుల పాటు భారీ వర్షాలు కురుస్తాయని వాతావరణ శాఖ వెల్లడించింది.

ఏపీలో ఇవాళ(జులై 13) మన్యం, అల్లూరిసీతారామరాజు, కాకినాడ, కోనసీమ,తూర్పుగోదావరి, పశ్చిమగోదావరి,ఏలూరు,గుంటూరు, బాపట్ల,పల్నాడు,ప్రకాశం,నంద్యాల, చిత్తూరు జిల్లాల్లో అక్కడక్కడా తేలికపాటి నుంచి మోస్తరు  వర్షాలు కురిసే అవకాశం ఉంది. 

 శ్రీకాకుళం, విజయనగరం, విశాఖపట్నం, అనకాపల్లి, కృష్ణా, ఎన్టీఆర్, నెల్లూరు, కర్నూలు, శ్రీ సత్యసాయి, వైయస్ఆర్, అన్నమయ్య మరియు తిరుపతి జిల్లాల్లోని కొన్ని ప్రాంతాల్లో  తేలికపాటి వర్షం కురిసే అవకాశం ఉందని ఏపీ విపత్తుల నిర్వహణ సంస్థ తెలిపింది.

ఆది,సోమవారాల్లో ఏపీలోని పలు ప్రాంతాల్లో అక్కడక్కడ మోస్తారు నుంచి భారీ వర్షాలు పడే అవకాశం ఉందని ఏపీ విపత్తుల నిర్వహణ సంస్థ హెచ్చరించింది. 

ఇక తెలంగాణలో చూస్తే శుక్రవారం పలు ప్రాంతాల్లో భారీ వర్షం కురిసింది. హైదరాబాద్‌ నగరంలోని పలుచోట్ల వర్షం కురిసింది. పలు లోతట్టు ప్రాంతాలు జలమయం అయ్యాయి. దీంతో పలు ప్రాంతాల్లో ట్రాఫిక్‌ అంతరాయం ఏర్పడింది.

ఇవాళ(జులై 13) తెలంగాణలోని ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, సిరిసిల్ల, కరీంనగర్, భూపాలపల్లి, ములుగు, కొత్తగూడెం, సిద్ధిపేట జిల్లాల్లో భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం తెలిపింది. ఈ జిల్లాలకు ఎల్లో హెచ్చరికలు జారీ అయ్యాయి. ఉరుములు, మెరుపులతో కూడిన ఈదురు గాలులు వీస్తాయని అంచనా వేసింది. 

జులై 17వ తేదీ వరకు తెలంగాణలో మోస్తారు నుంచి భారీ వర్షాలు కురిసే అవకాశం ఉంది. ఆయా జిల్లాలకు ఎల్లో హెచ్చరికలు జారీ అయ్యాయి.