అండమాన్‌ సముద్రంలోకి 'నైరుతి రుతుపవనాలు' వచ్చేస్తున్నాయ్...! ఐఎండీ అప్డేట్స్ ఇవిగో

నైరుతి రుతుపవనాలపై ఐఎండీ కీలక ప్రకటన చేసింది. మే 13వ తేదీ నాటికి దక్షిణ అండమాన్ సముద్రంలోని కొన్ని ప్రాంతాల్లోకి ప్రవేశించే అవకాశం ఉందని అంచనా వేసింది.

మే 13వ తేదీ నాటికి దక్షిణ అండమాన్ సముద్రం మాత్రమే కాకుండా... ఆగ్నేయ బంగాళాఖాతం, నికోబార్ దీవుల్లోని కొన్ని ప్రాంతాల్లోకి ప్రవేశించే అవకాశం ఉందని వాతావరణశాఖ పేర్కొంది.

సాధారణంగా జూన్‌ 1 లేదా మొదటి వారం నాటికి రుతుపవనాలు కేరళలోకి ప్రవేశిస్తాయి. ఆ తర్వాత దేశమంతటా విస్తరించి… వర్షాలు కురుస్తుంటాయి. ఏపీ, తెలంగాణలోనూ విస్తారంగా వర్షాలు కురుస్తుంటాయి.

జూన్ లో వచ్చే నైరుతి రుతుపవనాలు…. సెప్టెంబర్ మాసం రాకతో ఉపసంహరణ మొదలవుతుంది. అక్టోబరు నాటికి ముగుస్తుంది. అయితే నైరుతి రుతుపవనాల సమయంలో విస్తారంగా వర్షాలు కురిస్తే…. పలు రాష్ట్రాల్లో కరువు పరిస్థితులకు చెక్ పడుతుంది.

ఈ ఏడాది రుతుపవన కాలంలో సాధారణం కంటే అధిక వర్షాలు కురుస్తాయని వాతావరణశాఖ ఇప్పటికే వెల్లడించింది. ఐఎండీ అంచనాల మేరకు… విస్తారంగా వర్షాలు కురిస్తే…. తెలుగు రాష్ట్రాల్లోని ప్రాజెక్టులకు భారీగా వరద నీరు తరలివచ్చే అవకాశం ఉంటుంది.

మే 13వ తేదీ నాటికి దక్షిణ అండమాన్ కు రుతుపవనాలు చేరే అవకాశం ఉందని ఐఎండీ అంచనా వేస్తోంది. ఇదే జరిగితే కేరళలోకి జూన్ కంటే ముందుగానే ప్రవేశించే అవకాశం ఉంటుంది. దీనిపై మే 3 వారం నాటికి వాతావరణశాఖ మరింత స్పష్టత ఇచ్చే అవకాశం ఉంది.

నైరుతి రుతుపవనాల రాకతో ముందుగా తొలకరి చినుకులు పలుకరిస్తాయి. దీంతో రైతన్నులు చెలుకలు, పొలాల దుక్కులు దున్ని వ్యవసాయ పనుల్లో రైతులు బిజీగా బిజీగా ఉంటారు.