AP Banana Export Train : అరబ్‌ దేశాలకు అనంత అరటి - తాడిపత్రి నుంచి 'బనానా రైలు' బయల్దేరింది..!

అరటి తోటలకు అనంతపురం చాలా ఫేమస్. అయితే ఈ పండ్లకు అంతర్జాతీయంగానూ మంచి పేరుంది. ఈ సీజన్ లో ఇక్కడి అరటి పంటను అరబ్ దేశాలకు తరలిస్తున్నారు.

అనంతపురం జిల్లాలో పండే ఈ పంట… ఇరాన్, ఇరాక్, సౌదీ అరేబియా, దుబాయ్, బహ్రెయిన్‌ వంటి అరబ్‌ దేశాలకు  ఎగుమతి కానుంది. కేవలం విమానాల్లో కాకుండా… జల రవాణా మార్గాల ద్వారా ఖండాంతరాలు దాటనుంది.

జీ-9 అరటి రకం పంటను తరలించేందుకు తాడిపత్రి నుంచి శుక్రవారం ప్రత్యేక రైలు బయల్దేరింది. ఇందుకు దక్షిణ మధ్య రైల్వే ప్రత్యేక ఏర్పాట్లు చేసింది.  

34 బోగీల్లో 680 మెట్రిక్‌ టన్నులు అరటి పంటను రైలు ద్వారా ముంబైకి తరలించారు. ఈ సీజన్ లో ఇదే తొలి ట్రైన్ అని రైల్వే అధికారులు తెలిపారు.

ముంబై వరకి రైలు మార్గం ద్వారా చేరే ఈ అరటిని… అక్కడ్నుంచి ఓడల్లో రవాణా చేయనున్నారు. ఉద్యానశాఖ అధికారులు, ఎస్‌కే బనానా సంస్థ వారు ఇందుకు సంబంధించిన వివరాలను పేర్కొన్నారు.

అరబ్‌ దేశాలకు రైల్వే వ్యాగన్ల ద్వారా పంపడం ఇది రెండోసారి. గతంలోనూ భారీ స్థాయిలో పంపారు. ఈసారి జిల్లా ఉద్యానవనశాఖ, ఎస్కే ఎక్స్ పోర్ట్స్, CONCOR, దక్షిణ మధ్య రైల్వే భాగస్వామ్యంతో అరటి పండ్లను తరలించే కార్యక్రమం చేపట్టారు.