RR vs GT: సంజూ శాంసన్, రియాన్ పరాగ్ వీరబాదుడు.. మెరుపు హాఫ్ సెంచరీలు

ఐపీఎల్ 2024 టోర్నీలో గుజరాత్ టైటాన్స్ (GT)తో నేటి మ్యాచ్‍లో రాజస్థాన్ రాయల్స్ (RR) బ్యాటింగ్‍లో దుమ్మురేపింది. జైపూర్ వేదికగా రాజస్థాన్ కెప్టెన్ సంజూ శాంసన్, యంగ్ స్టార్ రియాన్ పరాగ్ మెరుపు అర్ధ శతకాలతో అదరగొట్టారు. 

ఈ మ్యాచ్‍లో రాజస్థాన్ కెప్టెన్ సంజూ శాంసన్ 38 బంతుల్లోనే 68 పరుగులతో (నాటౌట్) అదరగొట్టాడు. 7 ఫోర్లు, 2 సిక్సర్లతో మెరిపించాడు. గుజరాత్ బౌలర్లకు చెమటలు పట్టించాడు. చివరి వరకు నిలిచి జట్టుకు భారీ స్కోరు అందించాడు. ఈ 2024 సీజన్‍లో సంజూకు ఇది మూడో అర్ధ శతకంగా ఉంది. 

యంగ్ బ్యాటర్ రియాన్ పరాగ్ కూడా ఈ మ్యాచ్‍లో విజృంభించాడు. 48 బంతుల్లోనే 3 ఫోర్లు, 5 సిక్సర్లతో 76 పరుగులతో మెప్పించాడు. 

ఈ మ్యాచ్‍లో తొలుత బ్యాటింగ్ చేసిన రాజస్థాన్ ఓ దశలో 8 ఓవర్లకు 2 వికెట్లు కోల్పోయి 52 పరుగుల వద్ద నిలిచింది. ఆ తర్వాత సంజూ శాంసన్, రియాన్ పరాగ్ ధనాధన్ బ్యాటింగ్‍తో దుమ్మురేపారు. దీంతో ఆ తర్వాతి చివరి 12 ఓవర్లలో రాజస్థాన్ 144 పరుగులను సాధించింది.   

శాంసన్, పరాగ్ మెరుపులతో రాజస్థాన్ రాయల్స్ 20 ఓవర్లలో 3 వికెట్లకు 196 పరుగుల భారీ స్కోరు సాధించింది. గుజరాత్ టైటాన్స్ ముందు 197 పరుగుల లక్ష్యం ఉంది.