AP TG Weather Updates : తుఫాన్ ఎఫెక్ట్..! ఏపీకి భారీ వర్ష సూచన, ఆ తేదీ తర్వాత తెలంగాణలో మళ్లీ ఎండలు..!

బంగాళాఖాతంలో ఏర్పడిన అల్పపీడనం  వాయుగుండంగా మారిన తర్వాత ఈశాన్య దిశగా కదులుతూ శనివారం ఉదయానికి తూర్పు మధ్య బంగాళాఖాతంలో తుపానుగా బలపడుతుందని ఐఎండీ అంచనా వేసింది.

రాబోయే 2 రోజుల్లో నైరుతి రుతుపవనాలు దక్షిణ బంగాళాఖాతం, మధ్య బంగాళాఖాతంలోని కొన్ని ప్రాంతాల్లోకి విస్తరించేందుకు అనుకూల పరిస్థితులు ఉన్నాయని వాతావరణశాఖ తెలిపింది. 

ప్రస్తుత వాతావరణ పరిస్థితులతో ఏపీలో మే 26వ తేదీ వరకు తేలికపాటి నుంచి భారీ వర్షాలు కురిసే అవకాశం ఉందని ఐఎండీ పేర్కొంది. ఈ మేరకు తాజా బులెటిన్ ను విడుదల చేసింది.

 ఉత్తర కోస్తాలో ఇవాళ, రేపు, ఎల్లుండి తేలికపాటి నుంచి ఉరుములు, మెరుపులతో కూడిన భారీ వర్షాలు కురిసే అవకాశం ఉందని హెచ్చరించింది. పలు ప్రాంతాల్లో బలమైన ఈదురుగాలులు వీచే ఛాన్స్ ఉంది.

దక్షిణ కోస్తాతో పాటు రాయలసీమ జిల్లాల్లోనూ వానలు పడనున్నాయి. ఇవాళ, రేపు, ఎల్లుండి తేలికపాటి నుంచి ఉరుములు, మెరుపులతో కూడిన భారీ వర్షాలు కురిసే అవకాశం ఉందని వాతావరణశాఖ హెచ్చరించింది. పలు ప్రాంతాల్లో బలమైన ఈదురుగాలులు వీచే ఛాన్స్ ఉందని పేర్కొంది.

ఇక తెలంగాణలో మే 25తో పాటు 26వ తేదీ ఉదయం వరకు పలుచోట్ల తేలికపాటి నుంచి భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది. పలు జిల్లాలకు ఎల్లో హెచ్చరికలను జారీ చేసింది. ఆ తర్వాత రాష్ట్రంలో పొడి వాతావరణమే ఉంటుందని పేర్కొంది. ఎలాంటి హెచ్చరికలు లేవని తెలిపింది.