గోదావరిలో పెరుగుతున్న వరద - పాపికొండల విహారయాత్రకు బ్రేక్..!

ఏపీలోని పాపికొండలను చూసేందుకు చాలా మంది పర్యాటకులు తరలివస్తుంటారు. తూర్పు కనుమలలోని దట్టమైన అడవులతో కూడిన పర్వత శ్రేణిగా ఇవి ఉంటాయి. ఇవి పశ్చిమ గోదావరి, తూర్పు గోదావరి జిల్లాల నడుమ ఉన్నాయి.

పాపికొండలు చూసేందుకు రాజమండ్రి లేదా భద్రాచలం నుంచి వెళ్లొచ్చు.

రాజమహేంద్రవరం నుండి పాపికొండల విహార యాత్ర దేవిపట్నం మండలంలోని పోశమ్మగండి గుడి వరకు రోడ్డు మార్గంలో సాగుతుంది. అక్కడినుండి లాంచిలో పూడిపల్లి, సిరివాక, కొల్లూరు మీదుగా పేరంటాలపల్లి వరకు సాగుతుంది. ఈ యాత్రలో గోదావరి చాలా తక్కువ వెడల్పుతో కొండల మధ్య ప్రవహిస్తూ మరింత రమణీయంగా వుంటుంది.

అయితే ప్రతి ఏడాది కూడా వరద సమయంలో ఈ యాత్రపై ఆంక్షలు విధిస్తున్నారు. గతంలో జరిగిన దుర్ఘటనల నేపథ్యంలో ఈ ఆంక్షలను అమలు చేస్తున్నారు. తాజాగా వర్షాకాలం రావటంతో….గోదావరిలో వరద మొదలైంది. నీటిమట్టం క్రమంగా పెరుగుతూ వస్తోంది.

తాజాగా విహారయాత్రపై ఏపీ జలవనరుల శాఖ కీలక ప్రకటన విడుదల చేసింది. అల్లూరి జిల్లాలోని దేవీపట్నం నుంచి పాపికొండల విహారయాత్రను తాత్కాలికంగా నిలిపివేసింది. వర్షంతో పాటు గోదావరిలో నీటిమట్టం పెరుగుతున్న కారణంగా ఈ నిర్ణయం తీసుకున్నారు. దీంతో పాపికొండల విహార యాత్రకు బ్రేకులు పడినట్లు అయింది.

మళ్లీ గోదావరిలో వరద తగ్గముఖం పట్టి… నిలకడగా ఉన్న సమయంలోనే రాకపోకలకు అనుమతులు వస్తాయి.అప్పటి వరకు పాపికొండల విహార యాత్ర నిలిపివేస్తారు.