పాకిస్తాన్ ‘కుక్క తోక వంకర’ బుద్ధి; పీఓకేలో మళ్లీ ఉగ్రవాద శిబిరాల ప్రారంభం

పహల్గామ్లో ఉగ్రదాడి తర్వాత భారత సైన్యం 'ఆపరేషన్ సిందూర్'తో పాకిస్తాన్లోని ఉగ్రవాద శిబిరాలను ధ్వంసం చేసింది. పాక్ ఆక్రమిత కశ్మీర్ లో పాక్ మద్దతుతో నిర్మించిన ఉగ్రవాద లాంచ్ ప్యాడ్ లను కూడా భారత్ ధ్వంసం చేసింది. ఇప్పుడు పాక్ కొత్త కార్యకలాపాలు ఆ పీఓకే లో ప్రారంభమయ్యాయి. ధ్వంసమైన ఉగ్రవాదుల లాంచ్ ప్యాడ్ లను పాకిస్థాన్ పునర్నిర్మిస్తోంది.

సైన్యం, గూఢచార సంస్థ ఐఎస్ఐ, ప్రస్తుత ప్రభుత్వం సహాయంతో పాకిస్తాన్ లో ఈ ఉగ్రవాద శిబిరాల నిర్మాణం మళ్లీ ప్రారంభించాయని భారత నిఘా వర్గాలు గుర్తించాయి. పాక్ ఆక్రమిత కశ్మీర్ నడిబొడ్డున పాకిస్థాన్ హైటెక్ మిలిటెంట్ స్థావరాలను నిర్మిస్తోంది. అటవీ ప్రాంతాల్లో కూడా ఈ హైటెక్ ఉగ్రవాద శిబిరాలను నిర్మిస్తున్నారు. భారత ఇంటెలిజెన్స్ దృష్టిని తప్పించుకునేందుకు పాక్ అటవీ ప్రాంతంలో ఈ ఉగ్రవాద స్థావరాన్ని నిర్మిస్తోందని ఇంటెలిజెన్స్ వర్గాలు తెలిపాయి.

శాటిలైట్ చిత్రాలు, రాడార్లకు చిక్కకుండా ఉండేందుకు ఈ హైటెక్ ఉగ్రవాద స్థావరాలను నిర్మిస్తున్నట్లు చెబుతున్నారు. ఆపరేషన్ సిందూర్ సందర్భంగా పాకిస్తాన్ ఉగ్రవాద శిబిరాలను భారత సైన్యం ధ్వంసం చేసిన ప్రాంతాలు, లుని, పొత్వాల్, టిప్పు పోస్ట్, జమీల్ పోస్ట్, చాప్రా ఫార్వర్డ్, ఛోటా చౌక్, ఉమ్రాన్వాలి, జంగ్లీరా వంటి ప్రాంతాల్లో ఈ శిబిరాలను ఏర్పాటు చేస్తున్నట్లు నివేదిక తెలిపింది.

పాకిస్థాన్ లోని కేల్, సర్ది, నికైల్, చమన్ కోట్, కోట్లి, కహుతి, లిపా, ఆత్ముకామ్, జురా వంటి అనేక ప్రాంతాల్లో కొత్త శిబిరాలను ఏర్పాటు చేస్తున్నట్లు ఇంటలిజెన్స్ నివేదిక తెలిపింది. ఈ ప్రదేశాలన్నీ చాలా సవాలుతో కూడిన భూభాగంలో ఉన్నాయి. ఈ ప్రాంతంలో అనేక పంట పొలాలు ఉన్నాయి.