Ongole Breed Cow : ఒంగోలు జాతి ఆవు వరల్డ్ రికార్డ్, వేలంలో రూ.40 కోట్ల ధర

ఒంగోలు బ్రీడ్ ఆవులు, ఎద్దులకు దేశవిదేశాల్లో మంచి గిరాకీ ఉంది. సాధారణంగా వీటి ధర లక్షల్లో ఉంటుంది. దేశంలోని ఇతర జాతుల పశువులతో పోలిస్తే వీటి ధర కాస్త ఎక్కువ. అయితే ఒంగోలు బ్రీడ్ కు చెందిన ఓ ఆవు వేలంలో ఏకంగా రూ.40 కోట్లు పలికింది. 

ఇటీవల బ్రెజిల్‌ దేశంలో జరిగిన ఓ వేలంలో వయాటినా-19 అనే ఆవు 4.8 మిలియన్‌ డాలర్లు అంటే సుమారు రూ.40 కోట్లు ధర పలికి ప్రపంచంలోనే అత్యంత ఖరీదైన ఆవుగా రికార్డులకెక్కింది. ఇది ఒంగోలు జాతికి చెందిన ఆవు కావడం విశేషం.  

ప్రపంచంలో అత్యంత ఖరీదైన జాతులుగా జపాన్‌కు చెందిన వాగ్యు, భారత్‌కు చెందిన బ్రాహ్మణ్‌లను... బ్రెజిల్‌లోని మినాస్‌ గెరెయి‌స్ కు చెందిన వయాటినా-19 వేలంలో వెనక్కి నెట్టింది. 

ఒంగోలు జాతికి ఉండే ఆవులు చాలా దృఢమైన శరీర సౌష్ఠవం కలిగి ఉంటాయి. తెల్లటి శరీర రంగుతో మిలమిల మెరుస్తూ భారీగా ఉన్న వయాటినా వేలంలో వ్యాపారులను ఆకర్షించింది. ఈ జాతి ఆవుల పైచర్మం వదులుగా ఉండటం వల్ల ఎంతటి ఉష్ణ వాతావరణ పరిస్థితులనైనా తట్టుకోగలవు. 

ఒంగోలు జాతి అయినప్పటికీ సాధారణ ఆవు కంటే భారీ సైజ్ లో వయాటినా-19 ఉంటుంది. దీని బరువు 1,101 కిలోలు. అత్యంత ఖరీదైన ఆవుగా గిన్నీస్‌ బుక్‌ ఆఫ్‌ వరల్డ్‌ రికార్డ్సులో వయాటినా చోటు సాధించింది.

ఎంతో అందమైన మూపురంతో చూపరులను ఆకట్టుకున్న వయాటినా-19, ఆవుల ఛాంపియన్ ఆఫ్‌ ది వరల్డ్‌ పోటీలో మిస్‌ సౌత్‌ అమెరికా కిరీటాన్ని సైతం దక్కించుకుంది.  

1868లో బ్రెజిల్‌కు తొలిసాగి ఏపీలోని ఒంగోలు పశువులను తీసుకెళ్లారు. క్రమంగా ఈ జాతి పశువులను బ్రెజిల్ లో పెంచడం ప్రారంభమైంది. ఒంగోలు ఆవులు అత్యంత వేడి ఉష్ణోగ్రతలను తట్టుకునే సామార్థ్యం, సమర్థవంతమైన జీవక్రియ, ఇన్‌ఫెక్షన్‌లను తట్టుకుని నిలబడతాయి. దీంతో బ్రెజిల్‌ పశువుల పెంపకందారులు వీటి కొనుగోలకు మక్కువ చూపారు.