New Zealand vs Pakistan T20 Series: 105 పరుగులకే కుప్పకూలిన పాక్.. కివీస్ చేతిలో మళ్లీ చిత్తు.. సిరీస్ పోయింది

న్యూజిలాండ్ మరోసారి అదరగొట్టింది. ఆదివారం (మార్చి 23) నాలుగో టీ20లో కివీస్ 115 పరుగుల తేడాతో పాకిస్థాన్ ను చిత్తుచేసింది. మరో మ్యాచ్ ఉండగానే 5 టీ20ల సిరీస్ ను 3-1తో సొంతం చేసుకుంది.

ఫస్ట్ బ్యాటింగ్ చేసిన న్యూజిలాండ్ 20 ఓవర్లలో 6 వికెట్లకు 220 పరుగుల భారీ స్కోరు చేసింది. ఫిన్ అలెన్ (50) హాఫ్ సెంచరీ కొట్టాడు. సీఫర్ట్ (44), బ్రాస్ వెల్ (46 నాటౌట్) కూడా రాణించారు. పాక్ బౌలర్లలో హారిస్ రౌఫ్ 3, అబ్రార్ అహ్మద్ 2 వికెట్లు పడగొట్టారు.

ఛేజింగ్ లో కివీస్ పేసర్ జేకబ్ డఫ్పీ.. పాకిస్థాన్ పని పట్టాడు. నాలుగు వికెట్లతో అదరగొట్టాడు. దీంతో పాక్ 16.2 ఓవర్లలో 105 పరుగులకే కుప్పకూలింది. జకారీ ఫోల్క్స్ 3 వికెట్లు తీసుకున్నాడు.

పాకిస్థాన్ స్పిన్నర్ అబ్రార్ అహ్మద్ తీరు మారడం లేదు. ఛాంపియన్స్ ట్రోఫీలో శుభ్ మన్ ను ఔట్ చేసిన తర్వాత అబ్రార్ సెండాఫ్ ఇచ్చిన తీరుతో విమర్శలు వచ్చాయి. ఆ మ్యాచ్ లో పాక్ చిత్తుగా ఓడింది. అయినా న్యూజిలాండ్ తో నాలుగో టీ20లో బ్రాస్ వెల్ తో అబ్రార్ మాటల యుద్ధానికి దిగడం చర్చనీయాంశంగా మారింది.

సొంతగడ్డపై పాకిస్థాన్ తో టీ20 సిరీస్ లో న్యూజిలాండ్ ఆధిపత్యం ప్రదర్శిస్తోంది. పాకిస్థాన్ ను చిత్తుచిత్తుగా ఓడిస్తోంది. తొలి టీ20లో 9 వికెట్ల తేడాతో, రెండో టీ20లో 5 వికెట్ల తేడాతో కివీస్ గెలిచింది. మూడో టీ20లో పాక్ 9 వికెట్ల తేడాతో గెలిచినా.. మళ్లీ నాలుగో మ్యాచ్ లో చిత్తయింది.