Indiramma Housing Scheme : తెలంగాణ ప్రభుత్వం నుంచి గుడ్‌న్యూస్.. వారికి కూడా ఇందిరమ్మ ఇండ్లు!

రేషన్‌ కార్డు లేకపోయినా మొదటి విడతలో పేదలకు ఇందిరమ్మ ఇళ్లు మంజూరు చేయాలని ప్రభుత్వం నిర్ణయించినట్లు.. గృహ నిర్మాణ శాఖ మంత్రి పొంగులేటి శ్రీనివాస్ రెడ్డి స్పష్టం చేశారు. 

మొదటి విడతలో పేదలు, నిరుపేదల విభాగాలుగా పరిశీలించి ఇళ్లు మంజూరు చేయాలని నిర్ణయించామని మంత్రి పొంగులేటి వివరించారు. 

రెండో విడత నుంచి మాత్రం రేషన్‌ కార్డునే ప్రామాణికంగా తీసుకొని ఇండ్లు మంజూరు చేస్తామని.. పొంగులేటి శ్రీనివాస్ రెడ్డి తేల్చిచెప్పారు. 

తెలంగాణలో త్వరలోనే రేషన్‌ కార్డుల జారీ ప్రక్రియ ప్రారంభమవుతుందని రెవెన్యూ మంత్రి పొంగులేటి వెల్లడించారు. గ్రామాల్లో వృద్ధాప్య, వితంతువులు, దివ్యాంగులు తదితర పింఛనుకు అర్హులను గుర్తించాలని అధికారులకు సూచించారు. 

పంచాయతీ కార్యదర్శులు స్థానికంగానే నివాసం ఉండాలని మంత్రి పొంగులేటి స్పష్టం చేశారు. విధుల్లో నిర్లక్ష్యం వహించే వారిపై వేటు వేయాలని అధికారులను ఆదేశించారు.