AP TG Weather Report : బలహీనపడనున్న అల్పపీడనం - ఏపీకి వర్ష సూచన..! తెలంగాణలో చలి తీవ్రత, ఈ జిల్లాలకు ఎల్లో అలర్ట్

గల్ఫ్ ఆఫ్ మన్నార్ తో పాటు పరిసర ప్రాంతాలపై కేంద్రీకృతమైన అల్పపీడనం కొనసాగుతోందని ఐఎండీ తెలిపింది. దీనికి అనుబంధంగా ఉపరితల ఆవర్తనం కూడా ఉందని పేర్కొంది.
 

ఈ అల్పపీడనం పశ్చిమ- వాయువ్య దిశగా దక్షిణ తమిళనాడ వైపు కదులుతూ వచ్చి 12 గంటల్లో క్రమంగా బలహీనపడే అవకాశం ఉందని వాతావరణశాఖ అంచనా వేసింది.
 

ఈ ప్రభావంతో ఏపీలో ఇవాళ(డిసెంబర్ 12, 2024) ప్రకాశం, నెల్లూరు, కర్నూలు, నంద్యాల అనంతపురం, శ్రీ సత్య సాయి, వైఎస్ఆర్, అన్నమయ్య, చిత్తూరు మరియు తిరుపతి జిల్లాల్లో కొన్నిచోట్ల తేలికపాటి నుంచి మోస్తరు వర్షాలు పడే అవకాశం ఉంది.  
 

తిరుపతి, తిరుమలలో గురువారం ఉదయం భారీ వర్షం కురిసింది. భారీ వర్షంతో భక్తులు తీవ్ర ఇబ్బందులకు గురవుతున్నారు. మరోవైపు అల్పపీడన ప్రభావంతో తిరుమలలో చలి తీవ్రత కూడా పెరిగింది.

ఇక తెలంగాణలో చూస్తే చలి తీవ్రత పెరిగింది. రేపు (డిసెంబర్ 13, 2024) ఆదిలాబాద్,కొమరంభీమ్ ఆసిఫాబాద్, మంచిర్యాల, నిర్మల్ జిల్లాల్లో శీతల గాలులు వీచే అవకాశం ఉంది. ఈ జిల్లాలకు ఎల్లో హెచ్చరికలు జారీ అయ్యాయి.
 

డిసెంబర్ 14వ తేదీన తెలంగాణలోని ఆదిలాబాద్, ఆసిఫాబాద్, మంచిర్యాల, నిర్మల్ జిల్లాల్లో శీతల గాలులు వీచే అవకాశం ఉందని హైదరాబాద్ వాతావరణ కేంద్రం హెచ్చరించింది. ఈ జిల్లాలకు ఎల్లో హెచ్చరికలు జారీ అయ్యాయి. డిసెంబర్ 15వ తేదీ నుంచి పొడి వాతావరణం ఉంటుందని వివరించింది.