AP TG Weather Updates : ఐఎండీ రెయిన్ అలర్ట్.... రాయలసీమకు తేలికపాటి వర్ష సూచన..!

తెలుగు రాష్ట్రాల్లో ఎండలు దంచికొడుతున్నాయి. రోజురోజుకూ ఉష్ణోగ్రతలు పెరుగుతున్నాయి. మధ్యాహ్నం అయితే చాలు బయటికి రావాలంటే జనాలు భయపడిపోతున్నారు. 

ఏపీలోని ఉత్తర కోస్తా, దక్షిణ కోస్తాలో పూర్తిగా పొడి వాతావరణమే ఉండనుండగా… రాయలసీమకు మాత్రం ఐఎండీ చల్లని కబురు చెప్పింది. ఇవాళ పలుచోట్ల తేలికపాటి నుంచి ఒక మోస్తారు వర్షాలు కురిసే అవకాశం ఉందని అంచనా వేసింది.

నైరుతు బంగాళాతం మురియ తమిళనాడు తీర ప్రాంతం వరకు సగటు సముద్ర మట్టానికి 0.9 కిమీ ఎత్తులో ద్రోణి విస్తరించి ఉందని అమరావతి వాతావరణ కేంద్రం తెలిపింది. ఈ ప్రభావంతో పలుచోట్ల తేలికపాటి వర్షాలు కురిసే అవకాశం ఉందని పేర్కొంది.
 

అమరావతి వాతావరణ కేంద్రం తాజా బులెటిన్ ప్రకారం…ఇవాళ, రేపు ఉత్తర, దక్షిణ కోస్తాలో పూర్తిగా పొడి వాతావరణం ఉండనుంది. 2 నుంచి 4 డిగ్రీల వరకు గరిష్ట ఉష్ణోగ్రతలు అధికంగా నమోదయ్యే అవకాశం ఉందని పేర్కొంది. 

రాయలసీమ ఇవాళ తేలికపాటి జల్లులు కురిసే అవకాశం ఉంది. రేపు, ఎల్లుండి మాత్రం పొడి వాతావరణమే ఉండనుందని అమరావతి వాతావరణ కేంద్రం స్పష్టం చేసింది.

ఇక తెలంగాణలో చూస్తే పూర్తిగా పొడి వాతావరణమే ఉండనుంది. ఎలాంటి వర్ష సూచన లేదని హైదరాబాద్ వాతావరణ కేంద్రం తెలిపింది. ఎలాంటి హెచ్చరికలు కూడా లేవు

ఈ వేసవి వేళ గర్బిణీలు, బాలింతలు, చిన్నపిల్లలు, వృద్ధులు  వీలైనంత వరకు ఇంట్లోనే జాగ్రత్తగా ఉండాలని అధికారులు సూచిస్తున్నారు. మధ్యాహ్నం వేళ బయటికి వెళ్లకపోవడమే మంచిదని చెబుతున్నారు.