AP TG Weather Updates : ఎండలు మండుతున్న వేళ ఐఎండీ చల్లని కబురు - ఆ తేదీ నుంచి తెలంగాణలో వర్షాలు..!

ఉదయం 11 దాటితే చాలు ప్రజలు ఇబ్బందిపడిపోతున్నారు. ముఖ్యంగా మధ్యాహ్నాం సమయంలో ఎండ తీవ్రత మరీ ఎక్కువగా ఉంటోంది. అప్పుడే వేసవి వచ్చేసిందా..? అన్నట్లు పరిస్థితి కనిపిస్తోంది. 

చాలాచోట్ల ఇప్పటికే 37 డిగ్రీలకు పైగా ఉష్ణోగ్రతలు దాటిన పరిస్థితులు ఉన్నాయి. రాబోయే రోజుల్లో పరిస్థితి పూర్తిగా మారే అవకాశం కనిపిస్తోంది. తెలంగాణతో పోల్చితే.. ఏపీలోని కొన్ని ప్రాంతాల్లో ఎండల తీవ్రత కాస్త ఎక్కువగానే ఉంది. 

ఫిబ్రవరి మాసంలోనే ఎండలతో సతమవుతున్న తెలంగాణ వాసలకు ఐఎండీ చల్లని కబురు చెప్పింది. ఈనెలలో వర్షాలు కురిసే అవకాశం ఉందని అంచనా వేసింది. ఈ మేరకు హైదరాబాద్ వాతావరణ కేంద్రం వివరాలను పేర్కొంది. 

ఫిబ్రవరి 21వ తేదీ నుంచి తెలంగాణలోని పలుచోట్ల తేలికపాటి నుంచి ఒక మోస్తారు వర్షాలు కురిసే అవకాశం ఉందని హైదరాబాద్ వాతావరణ కేంద్రం పేర్కొంది. ఎలాంటి హెచ్చరికలు లేవని స్పష్టం చేసింది. 

ఫిబ్రవరి 23వ తేదీ వరకు తేలికపాటి నుంచి ఒక మోస్తారు వర్షాలు కురిసే అవకాశం ఉందని వివరించింది. ఫిబ్రవరి 20వ తేదీ వరకు మాత్రం పూర్తిగా పొడి వాతావరణమే ఉంటుందని అంచనా వేసింది.

తెలంగాణలో ఇవాళ్టి వెదర్ చూస్తే… పూర్తిగా పొడి వాతావరణమే ఉండనుంది. గరిష్ణ ఉష్ణోగ్రతలు సాధారణం కంటే 2 నుంచి 3 డిగ్రీలు ఎక్కువగా ఉండే అవకాశం ఉంది. ఇక ఏపీలో చూస్తే గరిష్ణ ఉష్ణోగ్రతలు సాధారణం కంటే 2 నుంచి 4 డిగ్రీల సెల్సియస్‌ ఉష్ణోగ్రతలు ఎక్కువగా నమోదయ్యే అవకాశం ఉంది. 

దక్షిణ కోస్తా. ఉత్తర కోస్తా, సీమ జిల్లాల్లో ఇవాళ, రేపు పొడి వాతావరణమే ఉండనుంది. గరిష్ణ ఉష్ణోగ్రతలు సాధారణం కంటే 2 నుంచి 4 డిగ్రీల సెల్సియస్‌ ఉష్ణోగ్రతలు ఎక్కువగా నమోదయ్యే అవకాశం ఉందని అమరావతి వాతావరణ కేంద్రం పేర్కొంది.