Lakshya Sen : లక్ష్యసేన్‍కు నిరాశ.. ఒలింపిక్స్ సెమీస్‍లో ఓటమి.. అయినా పతకం ఆశలు ఇంకా సజీవం

పారిస్ ఒలింపిక్స్ 2024లో సత్తాచాటి సెమీ ఫైనల్ వరకు దూసుకొచ్చాడు భారత యంగ్ బ్యాడ్మింటన్ స్టార్ లక్ష్యసేన్. అయితే, నేడు (ఆగస్టు 4) జరిగిన పురుషుల సింగిల్స్ సెమీస్‍లో డెన్మార్క్ స్టార్ ప్లేయర్ విక్టర్ అక్సెల్‍సన్ చేతిలో లక్ష్య ఓడిపోయాడు. 

ఈ సెమీస్‍లో 20-22,14-21 తేడాతో వరుస సెట్లలో ఒలింపిక్ డిఫెండింగ్ చాంపియన్ అక్సెల్‍సన్‍పై 22 ఏళ్ల లక్ష్యసేన్ పరాజయం చెందాడు. ధీటుగా పోటీ ఇచ్చినా.. చివరికి వరస సెట్లలోనే ఓటమి ఎదురైంది. 

ఈ మ్యాచ్‍లో రెండు గేమ్‍ల్లోనూ ముందుగా ఆధిక్యం ప్రదర్శించాడు. తొలి గేమ్‍లో ఓ దశలో 11-9తో ముందుకు వెళ్లాడు. లక్ష్య, అక్సెల్‍సన్ హోరాహోరీగా పోరాడారు. అయితే, చివరికి 22-20తో గేమ్ గెలిచాడు డెన్మార్క్ ప్లేయర్.

రెండో గేమ్‍లో లక్ష్యసేన్ ఆరంభంలో చెలరేగాడు. 7-0తో దుమ్మురేపాడు. అయితే, ఆ తర్వాత అక్సెల్‍సన్ అద్భుతంగా పుంజుకున్నాడు. 10-10తో సమం చేశాడు. ఆ తర్వాత ఆధిక్యంలోకి వెళ్లి ఈ గేమ్‍ను కూడా కైవసం చేసుకున్నాడు. దీంతో లక్ష్యకు ఓటమి ఎదురైంది.

సెమీస్‍లో ఓడినా పారిస్ ఒలింపిక్స్ 2024లో పతకం సాధించే అవకాశం లక్ష్యసేన్‍కు ఇంకా ఉంది. రేపు (ఆగస్టు 5) మలేషియా ప్లేయర్ లీ జీ జియాతో ప్లేఆఫ్‍లో అతడు తలపడనున్నాడు. ఈ మ్యాచ్ గెలిస్తే లక్ష్యసేన్‍కు కాంస్య పతకం దక్కుతుంది.