శ్రీశైలం వెళ్లే భక్తులకు అలర్ట్ - ఇక ఉచిత స్పర్శ దర్శనానికి ఆన్‌లైన్‌ టోకెన్లు, ఇలా బుకింగ్ చేసుకోండి

జూలై 1వ తేదీ నుంచి శ్రీశైల ఆలయంలో ‘ఉచిత స్పర్శ దర్శనాన్ని’ పునఃప్రారంభించారు. దీంతో చాలా మంది భక్తులు శ్రీశైలం వెళ్లేందుకు సిద్ధమవుతున్నారు. మరోవైపు భక్తుల రద్దీ కూడా ఎక్కువగానే ఉంటోంది.

అయితే భక్తుల రద్దీతో పాటు ఇతర కారణాల రీత్యా అధికారులు కీలక నిర్ణయం తీసుకున్నారు. ఉచిత స్పర్శ దర్శనానికి ఇక నుంచి ఆన్‌లైన్‌ ద్వారా టోకెన్లు జారీ చేస్తున్నట్లు ఆలయ ఈవో ఎం.శ్రీనివాసరావు శుక్రవారం ప్రకటించారు. దీంతో స్పర్శ దర్శనం కోసం ఆన్ లైన్ ద్వారా టోకెన్లు తీసుకోవాల్సి ఉంటుంది.

భక్తులకు అసౌకర్యం కలగకుండా ఉండటంతో పాటు పారదర్శకంగా సేవలు అందించే దిశగా ఆన్‌లైన్‌ ద్వారా మాత్రమే టోకెన్లు జారీ చేయనున్నట్లు అధికారులు వెల్లడించారు. ఈ దర్శనం కోసం వచ్చే భక్తులు…. www.srisailadevasthanam.org లేదా www.aptemples.ap.gov.in వెబ్‌సైట్ల ద్వారా రిజిస్ట్రేషన్ చేసుకోవాలి. పేరు, చిరునామా, ఆధార్‌ నంబరు నమోదు చేసి టోకెన్లు పొందాల్సి ఉంటుంది. ఒకరోజు ముందుగానే (సోమవారం నుంచి) వీటిని తీసుకోవచ్చు.

వారంలో మంగళవారం నుంచి శుక్రవారం వరకు ఈ అవకాశం ఉంటుంది. మధ్యాహ్నం 1.45 నుంచి 3.34 గంటల వరకు ఉచితంగా స్పర్శ దర్శనాన్ని అమలు చేస్తారు.స్పర్శ దర్శనంలో భాగంగా… ఆలయంలోని అభిషేక సమయంలో భక్తులు లింగాన్ని తాకే అవకాశం ఉంటుంది. దీన్నే స్పర్శదర్శనంగా పేర్కొంటారు. ఈ అవకాశం కోసం చాలా మంది శివభక్తులు ఎదురుచూస్తుంటారు.

ఆన్ లైన్ ద్వారా పొందే టోకెన్లను ఉచిత దర్శనం ప్రవేశద్వారం వద్ద గల స్కానింగ్ ద్వారా తనిఖీ చేసి భక్తులను ఉచిత స్పర్శ దర్శనానికి అనుమతించడం జరుగుతుంది. టోకెన్లు పొందిన భక్తులు మాత్రమే ఉచిత స్పర్శ దర్శనానికి అనుమతిస్తారు. వీరిని ఉచిత దర్శన క్యూలైన్ ద్వారా మాత్రమే అనుమతిస్తారు.