RR vs RCB Head to Head: నేడు రాజస్థాన్, ఆర్సీబీ పోరు.. హెడ్ టూ హెడ్ రికార్డ్స్ ఎలా ఉన్నాయంటే..

ఐపీఎల్ 2024 సీజన్‍లో ఇప్పటి వరకు తాను ఆడిన మూడు మ్యాచ్‍ల్లో గెలిచి ఫుల్ జోష్‍లో ఉంది సంజూ శాంసన్ సారథ్యంలోని రాజస్థాన్ రాయల్స్ (RR). ఇక ఈ సీజన్‍లో నాలుగు మ్యాచ్‍లు ఆడిన రాయల్ చాలెంజర్స్ బెంగళూరు (RCB) ఒకటే గెలిచి.. మూడింట ఓడి కష్టాల్లో ఉంది. ఈ రెండు జట్ల మధ్య నేడు (ఏప్రిల్ 6) జైపూర్ వేదికగా మ్యాచ్ జరగనుంది. 

ఐపీఎల్‍లో ఇప్పటి వరకు రాజస్థాన్ రాయల్స్, రాయల్ చాలెంజర్స్ బెంగళూరు జట్లు పరస్పరం 30 మ్యాచ్‍ల్లో తలపడ్డాయి. వీటిలో బెంగళూరు 15 సార్లు గెలువగా.. రాజస్థాన్ 12సార్లు విజయం సాధించింది. 3 మ్యాచ్‍లు రద్దయ్యాయి. రెండు జట్ల మధ్య హెడ్ టూ హెడ్ రికార్డ్ పరంగా బెంగళూరు కాస్త మెరుగ్గా ఉంది. 

ఐపీఎల్‍లో జైపూర్ వేదికగా ఇప్పటి వరకు రాజస్థాన్, బెంగళూరు 8 మ్యాచ్‍ల్లో ఢీకొన్నాయి. వీటిలో రాజస్థాన్ నాలుగు, బెంగళూరు నాలుగు మ్యాచ్‍ల్లో విజయం సాధించాయి. 

ఐపీఎల్ 2024 సీజన్‍లో నేడు రాజస్థాన్, బెంగళూరు మధ్య మ్యాచ్ జరిగే జైపూర్ సవాయ్ మాన్‍సింగ్ స్టేడియం పిచ్ బ్యాటింగ్‍కు అనుకూలంగా ఉంటుంది. ఈ సీజన్‍లో ఇప్పటికే ఇక్కడ జరిగిన రెండు మ్యాచ్‍ల్లో పిచ్ బ్యాటర్లకు మద్దతునిచ్చింది. ఈ పిచ్‍లో మంచి బౌన్స్, పేస్ ఉంటుంది. అయితే, మ్యాచ్ జరుగుతున్న కొద్ది కాస్త స్లో అయి స్పిన్నర్లకు కాస్త సహకారం లభిస్తుంది.

రాజస్థాన్, బెంగళూరు మధ్య మ్యాచ్ నేటి (ఏప్రిల్ 6) రాత్రి 7.30 గంటలకు మొదలుకానుంది. స్టార్ స్పోర్ట్స్ నెట్‍వర్క్ టీవీ ఛానెళ్లు, జియోసినిమా ఓటీటీ ప్లాట్‍ఫామ్‍లో ఈ మ్యాచ్ లైవ్ చూడొచ్చు.