IND vs IRE: అదరగొట్టిన జెమీమా.. టీమిండియా భారీ గెలుపు.. వన్డే సిరీస్ కైవసం

ఐర్లాండ్‍తో వన్డే సిరీస్‍ను 2-0తో దక్కించుకుంది టీమిండియా. రాజ్‍కోట్ వేదికగా నేడు (జనవరి 12) జరిగిన రెండో వన్డేలో భారత మహిళల జట్టు దుమ్మురేపింది. 116 పరుగుల భారీ తేడాతో విజయం సాధించింది. 

ఈ మ్యాచ్‍లో భారత బ్యాటర్ జెమీమా రోడ్రిగ్స్ విజృంభించారు. 91 బంతుల్లోనే 102 పరుగులతో అదరగొట్టారు. వన్డేల్లో తన తొలి శతకం చేశారు. సెంచరీ బాదాక బ్యాట్‍ను గిటార్‌లా పట్టుకొని సెలెబ్రేట్ చేసుకున్నారు జెమీమా.

జెమీమా శతకంతో రాణించగా.. కెప్టెన్ స్మృతి మంధాన (54 బంతుల్లో 73 పరుగులు), ప్రతిక రావల్ (67 పరుగులు), హర్లీన్ డియోల్ (89) అర్ధ శతకాలు చేశారు. దీంతో తొలుత బ్యాటింగ్ చేసిన భారత్ ఏకంగా 50 ఓవర్లలో 5 వికెట్లకు 370 పరుగుల భారీ స్కోరు చేసింది.

భారీ లక్ష్యఛేదనలో ఐర్లాండ్ తడబడింది. ఆ టీమ్ బ్యాటర్లను భారత బౌలర్లు కట్టడి చేశారు. 50 ఓవర్లలో 7 వికెట్లకు 254 పరుగులే చేసింది ఐర్లాండ్. క్రిస్టినా కల్టర్ రేలీ (80) మినహా మిగిలిన బ్యాటర్లు పెద్దగా రాణించలేదు. 

భారత బౌలర్లలో దీప్తి శర్మ మూడు వికెట్లు పడగొట్టారు. ప్రియా మిశ్రా రెండు, టిటాస్ సంధు, షాయాలి సత్ఘరే తలా ఓ వికెట్ తీశారు. మొత్తంగా 116 పరుగుల తేడాతో గ్రాండ్ విక్టరీ కొట్టింది భారత మహిళల జట్టు. జెమీమాకు ప్లేయర్ ఆఫ్ ది మ్యాచ్ అవార్డు దక్కింది.