IND vs CAN: మ్యాచ్ రద్దు: ఫుట్‍బాల్ ఆడుతూ.. ముచ్చట్లు పెడుతూ సరదాగా గడిపిన భారత ఆటగాళ్లు.. ఫ్యాన్స్‌కు పంత్ ఆటోగ్రాఫ్‍లు

టీ20 ప్రపంచకప్ 2024 గ్రూప్-ఏలో టీమిండియా చివరి మ్యాచ్ రద్దయింది. ఫ్లోరిడా వేదికగా కెనడాతో జరగాల్సిన ఈ మ్యాచ్ వర్షంతో చిత్తడైన ఔట్‍ఫీల్డ్ వల్ల టాస్ పడకుండానే క్యాన్సల్ అయింది. ఇప్పటికే మూడు మ్యాచ్‍లు గెలిచిన భారత్.. గ్రూప్-ఏలో టాపర్‌గా సూపర్-8లో అడుగుపెట్టింది. ఈ మ్యాచ్ జరగపోవటంతో భారత ఆటగాళ్లు సరదాగా గడిపారు. 

వర్షం నిలిచినా అప్పటికే ఫ్లోరిడా మైదానం ఔట్‍ఫీల్డ్ బాగా చిత్తడిగా మారింది. దీంతో పలుసార్లు ఇన్‍స్పెక్షన్ చేసిన అంపైర్లు ఇక ఆట సాధ్యం కాదని తేల్చేశారు. భారత్, కెనడా మ్యాచ్‍ను రద్దు చేస్తున్నట్టు ప్రకటించారు. 

అంతకు మందు టాస్ ఆలస్యం కావటంతో భారత ఆటగాళ్లు సరదాగా ఫుట్‍బాల్ ఆడారు. కెప్టెన్ రోహిత్ శర్మతో పాటు భారత ఆటగాళ్లందరూ సరదాగా ఫుట్‍బాల్ ఆడారు. సరదాగా ముచ్చట్లు పెట్టుకున్నారు. రెండున్నర గంటల తర్జనభర్జన తర్వాత ఈ మ్యాచ్‍ను రద్దు చేస్తున్నట్టు ప్రకటించారు అంపైర్లు.

మ్యాచ్ రద్దవడంతో స్టేడియానికి వచ్చిన ప్రేక్షకులు నిరాశ చెందారు. అయితే ఆటోగ్రాఫ్‍లు ఇచ్చి కొందరికి సంతోషాన్ని కలిగించాడు భారత స్టార్ వికెట్ కీపర్ బ్యాటర్ పంత్. ప్రేక్షకుల వద్దకే వెళ్లి ఆటోగ్రాఫ్‍లు ఇచ్చాడు. 

కెనడా ఆటగాళ్లతో భారత ప్లేయర్లు ముచ్చటించారు. కెనడా జట్టులోనూ చాలా మంది భారత సంతతి ప్లేయర్లు ఉన్నారు. భారత కెప్టెన్ రోహిత్ శర్మ.. కెనడా ప్లేయర్లతో మాట్లాడాడు.

భారత స్టార్ ప్లేయర్ విరాట్ కోహ్లీతో కెనడా ప్లేయర్లు ఫొటోలు దిగారు. కోహ్లీ వారితో ముచ్చటించాడు. కోహ్లీని కలిసినందుకు కెనడా ఆటగాళ్లు చాలా సంతోషంగా కనిపించారు. 

టీమిండియా ప్రపంచకప్‍లో తదుపరి సూపర్-8 మ్యాచ్‍లు ఆడనుంది. జూన్ 20న అఫ్గానిస్థాన్‍తో భారత్ తలపడుతుంది. జూన్ 22న డీ2లో నిలిచే జట్టు (బంగ్లాదేశ్ లేదా నెదర్లాండ్స్)తో ఆడుతుంది. జూన్ 24న ఆస్ట్రేలియాతో టీమిండియా తలపడనుంది. సూపర్-8 నుంచి వెస్టిండీస్‍లోనే మ్యాచ్‍లు జరుగుతాయి.