Bangladesh: బంగ్లాదేశ్ లో 'సేవ్ హిందూస్' అంటూ భారీగా హిందువుల నిరసనలు

17 కోట్ల జనాభా ఉన్న బంగ్లాదేశ్ లో హిందువులు మొత్తం జనాభాలో 8 శాతం ఉన్నారు. ప్రస్తుతం దేశంలో నెలకొన్న హింసాత్మక పరిస్థితుల నేపథ్యంలో మైనారిటీలైన హిందువులపై కూడా దాడులు జరుగుతున్నాయి. ఈ దాడుల్లో 45 మంది హిందువులు గాయపడగా, ఒక స్కూల్ టీచర్ మృతి చెందారు.

మాజీ ప్రధాని షేక్ హసీనా పదవీచ్యుతురాలైన తర్వాత హిందూ మైనారిటీ కమ్యూనిటీపై జరుగుతున్న హింసకు నిరసనగా ఢాకా వీధుల్లో వందలాది మంది బంగ్లాదేశీ హిందువులు నిరసన వ్యక్తం చేస్తున్నారు.

బంగ్లాదేశ్ లోని హిందూ కమ్యూనిటీ సభ్యులు ఢాకాలోని ఒక ప్రధాన కూడలిని దిగ్బంధించారు, "మేము ఎవరు, బెంగాలీ బెంగాలీ" అని నినాదాలు చేస్తూ, హిందువులపై హింసను ఆపాలని కోరుతూ ప్లకార్డులు పట్టుకున్నారు.

విద్యార్థుల నాయకత్వంలో జరిగిన తిరుగుబాటు మాజీ ప్రధాని షేక్ హసీనా రాజీనామాకు దారితీసిన తరువాత, హిందువులకు చెందిన అనేక వ్యాపారాలు, గృహాలు లక్ష్యంగా దాడులు జరిగాయి. షేక్ హసీనా, అవామీ లీగ్ లకు హిందూ సంఘాలు మద్ధతుగా ఉన్నాయన్న భావన ఇందుకు ఒక కారణం.

మహమ్మద్ యూనస్ తాత్కాలిక అధ్యక్షుడిగా ప్రమాణ స్వీకారం చేసిన మరుసటి రోజే ఈ నిరసనలు జరగడం గమనార్హం. ఐక్యరాజ్యసమితి ప్రధాన కార్యదర్శి ఆంటోనియో గుటెరస్ బంగ్లాదేశ్ లో హింసను ఖండించారు. దేశంలో శాంతిని పునరుద్ధరించడానికి ప్రభుత్వం చర్యలు తీసుకోవాలని కోరారు.

మాజీ ప్రధాని హసీనా రాజీనామా చేసినప్పటి నుంచి జరుగుతున్న హింస కారణంగా భారత్ లోకి ప్రవేశించే ప్రయత్నంలో పలువురు బంగ్లాదేశీ హిందువులు శుక్రవారం భారత సరిహద్దు ప్రాంతమైన కూచ్ బెహార్ లోని సితాల్ కుచి వద్ద గుమిగూడారు.