Hyderabad To Andhra Routes : హైదరాబాద్ టు ఆంధ్రా సంక్రాంతి ప్రయాణాలు, ఈ రూట్లలో వెళ్తే ట్రాఫిక్ లో చిక్కుకోరు!

హైదరాబాద్ నుంచి సంక్రాంతి పండుగకు సొంతూళ్లకు ప్రయాణాలు మొదలయ్యాయి. హైదరాబాద్-విజయవాడ జాతీయ రహదారిపై శనివారం ఉదయం నుంచి రద్దీ పెరిగింది. దీంతో అబ్దుల్లాపూర్మెట్ ఓఆర్ఆర్ వద్ద భారీగా ట్రాఫిక్ జామ్ అయ్యింది. 
కొత్తగూడెం వరకు వాహనాలు నెమ్మదిగా కదులుతున్నాయి. 

చౌటుప్పల్‌ పంతంగి టోల్‌ ప్లాజా వద్ద కిలోమీటర్ల మేర వాహనాలు బారులు తీరాయి. 10 టోల్‌ బూత్‌ల ద్వారా ఆంధ్రా వైపు వెళ్తోన్న వాహనాలను పంపిస్తున్నారు. చౌటుప్పల్‌ చౌరస్తాలో అండర్‌పాస్‌ పనుల కారణంగా ట్రాఫిక్‌ జామ్‌ పెరిగింది. 

ఇవాళ, రేపు రద్దీ మరింత పెరిగే అవకాశం ఉంది. రద్దీ దృష్ట్యా ప్రయాణికులు ప్రత్యామ్నాయ ఎంచుకోవాలని పోలీసులు సూచిస్తున్నారు. హైదరాబాద్ లోని ఎంజీబీస్‌, జేబీఎస్‌, దిల్‌సుఖ్‌ నగర్‌ బస్టాండ్ లు, ఎల్బీ నగర్‌ చౌరస్తా రద్దీగా మారాయి.

ట్రాఫిక్ జామ్ లో ఇరుక్కోకుండా తొందరగా వెళ్లేందుకు ఏపీ వైపు వెళ్లే వాహనదారులకు పోలీసులు ప్రత్యామ్నాయ మార్గాలు సూచిస్తున్నారు.  పెద్ద అంబర్ పేట్ (EXIT-11) నుంచి చౌటుప్పల్ మీదుగా చిట్యాల వరకు వాహనాల రద్దీ ఎక్కువగా ఉందని పోలీసులు తెలిపారు. 

ఘట్కేసర్ (EXIT-9) నుంచి భువనగిరి-వలిగొండ- రామన్నపేట మీదుగా చిట్యాల చేరుకోవచ్చని పోలీసులు వాహనదారులకు సూచించారు. గుంటూరు వైపు వెళ్లేవాళ్లు బొంగులూరు [EXIT-121] గేటు నుంచి ఇబ్రహీంపట్నం-మాల్ - దేవరకొండ మీదుగా గుంటూరు చేరుకోవచ్చని తెలిపారు. 

హైదరాబాద్‌ నుంచి గుంటూరు, మాచర్ల, అద్దంకి, ఒంగోలు, నెల్లూరు వైపు వెళ్లే వాహనదారులు నార్కట్‌పల్లి-అద్దంకి హైవేపై ప్రయాణిస్తూ ఉంటారు. వీళ్లు విజయవాడ హైవే మీదుగా వస్తే హయత్‌నగర్, అబ్దుల్లాపూర్‌మెట్, చౌటుప్పల్, పంతంగి టోల్‌ప్లాజా వద్ద ట్రాఫిక్‌లో చిక్కుకునే అవకాశం ఉంది. 

ఇందుకు ప్రత్యామ్నాయంగా కొంచెం ఎక్కువ దూరం అయినా హైదరాబాద్‌-నాగార్జునసాగర్‌ హైవే మీదుగా వెళ్తే ప్రయాణం సౌకర్యవంతంగా ఉంటుంది. హైదరాబాద్‌ నుంచి వెళ్లే వాహనాలు ఓఆర్‌ఆర్‌పైకి వెళ్లి బొంగులూరు గేట్‌ వద్ద ఎగ్జిట్‌ తీసుకుని.. నాగార్జునసాగర్‌ హైవేపైకి ఎక్కితే ట్రాఫిక్ ను తప్పించుకోవచ్చు.