భారీ వర్షాలకు కనిపించని ముంబై రోడ్లు.. ఇంకొన్ని రోజుల పాటు పరిస్థితి ఇదే!

మహారాష్ట్రలో రుతుపవనాలు పురోగతి సాధించాయి. గత రెండు రోజులుగా ముంబైలో భారీ వర్షాలు కురుస్తున్నాయి. ఇది ముంబై వాసులకు ఉపశమనం కలిగించింది. ఇదిలా ఉంటే ముంబైలో మరికొన్ని రోజులు భారీ వర్షాలు కురుస్తాయని వాతావరణ శాఖ అంచనా వేసింది.

ముంబై, థానే, పాల్ఘర్, పుణెలో కూడా నిన్న రాత్రి నుంచి భారీ వర్షాలు కురుస్తుండటంతో లోతట్టు ప్రాంతాలు జలమయం అయ్యాయి.

ముంబై నగరంలో ఈ ఉదయం నుంచి వర్షాలు కురుస్తున్నాయి, రాబోయే 24 గంటల్లో రుతుపవనాలు రాష్ట్రమంతా విస్తరించే అవకాశం ఉందని వాతావరణ శాఖ అంచనా వేసింది.

ముంబై, దాని శివారు ప్రాంతాల్లో శుక్రవారం భారీ వర్షాలు కురిశాయని, శనివారం మరో మూడు, నాలుగు గంటల్లో భారీ నుంచి అతి భారీ వర్షాలు కురుస్తాయని  భారత వాతావరణ శాఖ (ఐఎండీ) తెలిపింది.

నాగ్​పూర్​, అమరావతి, యావత్మాల్, గడ్చిరోలిలో భారీ నుంచి అతి భారీ  వర్షాలు కురుస్తాయని, నాసిక్, అహ్మద్​నగర్, ధూలే, నందుర్బార్, జల్గావ్​లో భారీ వర్షాలు కురుస్తాయని ఐఎండీ తెలిపింది.

ముంబైతో పాటు సింధుదుర్గ్, రాయ్గఢ్, పాల్ఘర్ జిల్లాలకు వాతావరణ శాఖ ఆరెంజ్ అలర్ట్ జారీ చేసింది.

విదర్భ, నాగ్పూర్, అమరావతి, యావత్మాల్, గడ్చిరోలి జిల్లాల్లో  భారీ నుంచి అతి భారీ వర్షాలు కురిసే అవకాశం ఉందని ఎల్లో అలర్ట్ ప్రకటించారు అధికారులు.