AP Half Day Schools 2025 : ఏపీలో ఈసారి కాస్త ముందుగానే 'ఒంటిపూట బడులు'….! ఇవిగో అప్డేట్స్

తెలుగు రాష్ట్రాల్లో ఎండలు దంచికొడుతున్నాయి. గతేడాది మాదిరి కాకుండా… ఫిబ్రవరి మొదటి వారం నుంచే భానుడు ప్రతాపం చూపిస్తున్నాడు. దీంతో ఉదయం దాటితే బయటికి వెళ్లాలంటే.. జనం జంకుతున్నారు.

తెలంగాణతో పోల్చితే ఏపీలోని చాలా జిల్లాల్లో ఉష్ణోగ్రతల తీవ్రత ఎక్కువగా ఉంటోంది. చాలా జిల్లాల్లో 35 డిగ్రీలకుపైగా సెంటిగ్రేడ్ ల ఉష్ణోగ్రతలు రికార్డవుతున్నాయి. మార్చి రావటంతో… పరిస్థితి మరింత ముదిరే అవకాశం ఉంది. 

ఎండల తీవ్రత పెరుగుతుండటంతో ఏపీ విద్యాశాఖ ఒంటిపూట బడులపై కసరత్తు చేసే పనిలో పడింది. గతేడాదితో పోల్చితే ఈసారి కాస్త ముందుగానే ఒంటి పూట బడులను ప్రారంభించాలని యోచిస్తోంది.

గతేడాదిలో మార్చి 18వ తేదీ నుంచి ఏపీలో ఒంటి పూట బడులు ప్రారంభమయ్యాయి. అయితే ఈసారి మార్చి 15వ తేదీ నుంచే ప్రారంభించే అవకాశం ఉంది.  ఇందుకు సంబంధించిన ప్రణాళికను పాఠశాల విద్యాశాఖ ఇప్పటికే సిద్ధం చేసినట్లు తెలిసింది. 

ఎండల తీవ్ర ఎక్కువగా ఉండటంతో పాటు మార్చిలో మరింత పెరిగే అవకాశం ఉందని ఉపాధ్యాయులు చెబుతున్నారు. వీలైతే మార్చి మొదటి వారం నుంచే  ప్రారంభించే అవకాశాలపై ప్రభుత్వం దృష్టి పెట్టాలని కోరుతున్నారు.