IND vs AUS 5th Test: ఐదో టెస్టులో పింక్ క్యాప్‍లు ధరించనున్న ఆస్ట్రేలియా ప్లేయర్లు.. ఎందుకిలా?

టీమిండియాపై ఆస్ట్రేలియా నాలుగో టెస్టులో విజయం సాధించింది. మెల్‍బోర్న్ వేదికగా జరిగిన మ్యాచ్‍లో గెలిచి ఐదు టెస్టుల సిరీస్‍లో 2-1తో ముందంజ వేసింది ఆసీస్. భారత్, ఆస్ట్రేలియా మధ్య సిరీస్‍లో చివరిదైన ఐదో టెస్టు సిడ్నీ వేదికగా శుక్రవారం (జనవరి 3) నుంచి జరగనుంది. రెండు జట్లకు ఈ ఏడాది 2025లో ఇదే మొదటి పోరు. ఈ మ్యాచ్‍లో ఆస్ట్రేలియా ప్లేయర్లు పింక్ క్యాప్స్ ధరించనున్నారు. 

రొమ్ము క్యాన్సర్‌కు వ్యతిరేకంగా అవగాహన కల్పించడంలో భాగంగా ఈ ఐదో మ్యాచ్.. పింక్ టెస్టుగా జరగనుంది. క్యాన్సర్ నిర్మూలన కోసం ఆసీస్ దిగ్గజ బౌలర్ గ్లెన్ మెక్‍గ్రాత్ ఓ ఫౌండేషన్ స్థాపించారు. మెక్‍గ్రాత్ ఫౌండేషన్ తరఫున అవగాహన కార్యక్రమాలు నిర్వహిస్తుంటారు. ఇందుకు మద్దతుగా ఆస్ట్రేలియా పింక్ టెస్ట్ ఆడనుంది. 

భారత్‍తో ఐదో టెస్టులో పింక్ క్యాప్‍లను ఆస్ట్రేలియా ఆటగాళ్లు ధరించనున్నారు. జెర్సీలపై లోగోలు కూడా పింక్ కలర్‌లో ఉండనున్నాయి. పింక్ కిట్‍లతో ఆసీస్ ఆటగాళ్లు బరిలోకి దిగనున్నారు. వీటితో ఓ నేడు ఫొటో షూట్ నిర్వహించారు. 

మెక్‍గ్రాత్ ఫౌండేషన్ చొరవతో 2009లో ఈ పింక్ టెస్ట్ సంప్రదాయం మొదలైంది. అప్పటి నుంచి ప్రతీ సంవత్సరం పింక్ కిట్‍తో ఓ మ్యాచ్ ఆడుతూ వస్తోంది ఆసీస్. 

2008లో మెక్‍గ్రాత్ భార్య జెన్.. రొమ్ము క్యాన్సర్ వల్ల మరణించారు. దీంతో రొమ్ము క్యాన్సర్‌కు వ్యతిరేకంగా జనాలకు అవగాహన కల్పించాలని మెక్‍గ్రాత్ నిర్ణయించారు. అవగాహన కల్పించేందుకు, బాధితులకు అండగా ఉండేందుకు మెక్‍గ్రాత్ ఫౌండేషన్‍ను స్థాపించారు.