GHMC Property Tax : నగరవాసులారా... ఈ ఛాన్స్ మిస్ కాకండి - ఆస్తి పన్ను చెల్లింపులపై డిస్కౌంట్..! ఇవిగో వివరాలు

జీహెచ్ఎంసీ పరిధిలో ఆస్తి పన్ను చెల్లింపు బకాయిదారులకు ప్రభుత్వం వెసులుబాటు కల్పించింది. 90 శాతం వడ్డీ మాఫీతో మొత్తం ఒకేసారి పన్ను బకాయిలు చెల్లించేలా మరోసారి ఓటీఎస్‌ను అమలు చేస్తున్నట్లు వెల్లడించింది.

గతేడాది కూడా ఓటీఎస్ ను ప్రకటించారు. అయితే ఈసారి 90 శాతం వడ్డీ మాఫీతో మొత్తం ఒకేసారి పన్ను బకాయిలు చెల్లించేలా మరోసారి ఓటీఎస్‌ను అమలు చేయాలని సర్కార్ నిర్ణయించింది. ఈ మేరకు పురపాలక శాఖ ముఖ్య కార్యదర్శి దాన కిషోర్ శుక్రవారం(మార్చి 07) ఉత్తర్వులు జారీ చేశారు.

ప్రభుత్వం తాజాగా ప్రకటించిన ఓటీఎస్ ద్వారా…. 2024-2025 ఆర్థిక సంవత్సరానికి సంబంధించి మొత్తం పన్నుతో పాటు వడ్డీ 10 శాతం చెల్లిస్తే సరిపోతుందని ప్రభుత్వం ఉత్తర్వుల్లో తెలిపింది.

వన్ టైమ్ సెటిల్‌మెంట్ అవకాశాన్ని ఉపయోగించుకుని నగర వాసులు సకాలంలో అస్తి పన్ను చెల్లించాలని పురపాలక శాఖ ముఖ్య కార్యదర్శి దాన కిశోర్ కోరారు. ఈ అవకాశాన్ని వినియోగించుకోవాలని సూచించారు.

గతేడాది కూడా జీహెచ్ఎంసీ పరిధిలో ఓటీఎస్ ను తీసుకువచ్చారు. దీనివల్ల ఎంతో మంది  ఆస్తి పన్ను చెల్లించేందుకు ముందుకొచ్చినట్లు అధికారులు గుర్తు చేస్తున్నారు. ఈసారి కూడా అదే మాదిరిగా నగరవాసుల నుంచి స్పందన వచ్చే అవకాశం ఉందని భావిస్తున్నారు.

ఈ సారి ఆస్తి పన్నుకు సంబంధించి రూ. రెండు వేల కోట్లు వసూలు చేయడమే లక్ష్యంగా జీహెచ్ఎంసీ ముందుకెళ్తోంది. ఓటీఎస్ ప్రతిపాదనకు  రాష్ట్ర ప్రభుత్వం గ్రీన్ సిగ్నల్ ఇవ్వటంతో…. ఆశించిన స్థాయిలో పన్నులు వసూలు అవుతాయని మున్సిపల్ అధికారులు భావిస్తున్నారు.