AP Telangana Rains : ఎటు చూసినా నీళ్లు.. ప్రజల కన్నీళ్లు.. హృదయాన్ని కదిలించే దృశ్యాలు

విజయవాడను వరద ముంచెత్తుతుంది. కుమ్మరిపాలెం సెంటర్‌ దగ్గర హైవే పైకి వరద నీరు చేరింది. రోడ్లపై పడవలతో ప్రయాణంచేస్తున్నారు. లోతట్టు ప్రాంత వాసులను అధికారులు ఖాళీ చేయిస్తున్నారు.

మహబూబాబాద్ జిల్లా మరిపెడ మండలం సీతారాం తండాలో.. వరద ధాటికి ఇళ్లలోకి నీరు చేరింది. దీంతో ఇబ్బందులు పడుతున్న దాదాపు 100 మంది తండా వాసులను ఎస్సై నగేష్, తన సిబ్బంది రాము, మహిపాల్‌లతో కలిసి జాగ్రత్తగా సురక్షిత ప్రాంతాలకు తరలించారు.

బుడమేరు దెబ్బకు విజయవాడ శివారు ప్రాంతాలు జలమయం అయ్యాయి. 24 కాలనీలు, పలు గ్రామాలను వరద నీరు ముంచెత్తింది. భారీ వర్షాలు, వరదల నేపథ్యంలో విజయవాడలో ప్రాంతాల వారీగా ప్రత్యేక అధికారులను ప్రభుత్వం నియమించింది. ఈ అధికారులు క్షేత్రస్థాయిలో బాధితులకు అందుబాటులో ఉండనున్నారు. 

విజయవాడలోని పెద్దపులి పాకలో రెస్క్యూ ఆపరేషన్ జరుగుతోంది. 3 వ బెటాలియన్ ఎస్‌డిఆర్‌ఎఫ్ సిబ్బంది ఈ రెస్క్యూ ఆపరేషన్‌లో పాల్గొన్నారు. లోతట్టు ప్రాంతాల వారిని సురక్షిత ప్రాంతాలకు తరలిస్తున్నారు.

వరద పరిస్థితులపై చంద్రబాబును ప్రధాని మోదీ అడిగి తెలుసుకున్నారు. కేంద్ర ప్రభుత్వపరంగా అన్ని సహాయ సహకారాలు అందిస్తామని సీఎంకు హామీ ఇచ్చారు. ప్రస్తుతం జరుగుతున్న వరద సహాయ చర్యలపై ప్రధానికి సీఎం వివరించారు.

వరదపోటుతో యనమలకుదురు నీట మునిగింది. ఇళ్లలోకి వరద నీరు చేరింది. వేల సంఖ్యలో నిర్వాసితులు ఉన్నారు. బోట్లలో నిర్వాసితుల్ని సురక్షిత ప్రాంతాలకు తరలిస్తున్నారు.