Delhi rains : భారీ వర్షాలకు అల్లాడిపోతున్న దిల్లీ- ఇప్పటికే 11 మంది..

శుక్రవారం 24 గంటల్లో 228 మిల్లీమీటర్ల వర్షపాతం నమోదైన దిల్లీలో శనివారం మళ్లీ వర్షం కురిసింది. మొత్తం మీద వర్షాల కారణంగా ఇప్పటివరకు దిల్లీలో 11మంది మరణించారు.

1936 తర్వాత దిల్లీలో ఒక రోజులో ఇంత భారీ వర్షపాతం నమోదు కావడం ఇదే తొలిసారి అని భారత వాతావరణ శాఖ (ఐఎండీ) తెలిపింది.

రానున్న ఐదు రోజుల్లో హరియాణా-ఛండీగఢ్-దిల్లీలో ఉరుములు, మెరుపులతో కూడిన తేలికపాటి నుంచి ఒక మోస్తరు వర్షాలు కురిసే అవకాశం ఉందని ఐఎండీ అంచనా వేసింది. జూన్ 29 నుంచి జూలై 1 వరకు పలు ప్రాంతాల్లో భారీ నుంచి అతి భారీ వర్షాలు కురిసే అవకాశం ఉంది.

మరో నాలుగు రోజుల పాటు దిల్లీలో ఆరెంజ్ అలర్ట్​ని వాతావరణ శాఖ జారీ చేసింది.

రుతుపవనాలు శుక్రవారం ఢిల్లీకి ప్రవేశించి నగరంలోని వివిధ ప్రాంతాలను ముంచెత్తాయి. రోడ్లన్నీ జలమయం అయ్యాయి. ప్రజలు తీవ్రంగా ఇబ్బంది పడ్డారు.

భారీ వర్షాల నేపథ్యంలో 24 గంటలూ పనిచేసే ఎమర్జెన్సీ కంట్రోల్ రూమ్​ను ఏర్పాటు చేయాలని దిల్లీ లెఫ్టినెంట్ గవర్నర్ వీకే సక్సేనా ఆదేశించారు.