AP TG Rain ALERT : రేపు బంగాళాఖాతంలో మరో అల్పపీడనం..! ఏపీ, తెలంగాణకు మళ్లీ వర్ష సూచన..!

భూమధ్య రేఖ ప్రాంత హిందూ మహాసముద్రం దానికి అనుకుని ఉన్న ఆగ్నేయ బంగాళాఖాతంలో సగటు సముద్రమట్టానికి 3.1 కిమీ ఎత్తు వరకు ఉపరితల ఆవర్తనం విస్తరించి ఉందని ఐఎండీ తాజా బులెటిన్ తెలిపింది.
 

సుమారు డిసెంబర్ 7వ తేదీ నాటికి దక్షిణ బంగాళాఖాతంలోని మధ్య ప్రాంతంలో ఒక అల్పపీడనం ఏర్పడే అవకాశం ఉందని వాతావరణశాఖ అంచనా వేసింది. 

ఇది పశ్చిమ - వాయువ్య దిశగా కదిలి నైరుతి బంగాళాఖాతం మీదుగా డిసెంబర్ 12వ తేదీ నాటికి శ్రీలంక - తమిళనాడు తీరాల వద్దకు చేరుతుందని అంచనా వేసింది. ఈ ప్రభావంతో తెలుగు రాష్ట్రాల్లో వర్షాలు కురవనున్నాయి.

ఇవాళ, రేపు ఉత్తర కోస్తా, దక్షిణ కోస్తాతో పాటు సీమలో తేలికపాటి నుంచి మోస్తారు వర్షాలు కురిసే అవకాశం ఉందని అమరావతి వాతావరణ కేంద్రం అంచనా వేసింది. ఎలాంటి హెచ్చరికలు లేవని తెలిపింది.

ఇక తెలంగాణలో చూస్తే ఇవాళ్టి నుంచి డిసెంబర్ 11వ తేదీ వరకు తేలికపాటి నుంచి ఒక మోస్తారు వానలు కురుస్తాయని హైదరాబాద్ వాతారవణ కేంద్రం అంచనా వేసింది. ఎలాంటి హెచ్చరికలు లేవని తెలిపింది. 
 

డిసెంబర్ 12వ తేదీ నుంచి తెలంగాణలో పొడి వాతావరణం ఉంటుందని పేర్కొంది.
 

రేపు తెలంగాణలోని పలు జిల్లాల్లో ఉదయం సమయంలో పొగ మంచు తీవ్రత ఎక్కువగా ఉంటుందని హైదరాబాద్ వాతావరణ కేంద్రం హెచ్చరించింది.

ఉపరిత ఆవర్తనం, అల్పపీడనం ప్రభావంతో వాతావరణంలో మరిన్ని మార్పులు రావొచ్చు. చాలా చోట్ల కూడా వానలు కురిసే అవకాశం ఉంటుందని ఐఎండీ అంచనా వేస్తోంది.