హుష్.. హుష్..! అంటూ కాకులను తరిమేస్తున్నారా? జాగ్రత్త మరి అవి పగపడతాయట!

పక్షులన్నింటిలో కాకులకు చెడ్డ పేరు ఉంది. చాలామంది కాకిని చూడటం అశుభం అని కూడా భావిస్తారు. కానీ కాకులు పక్షులలో అత్యంత తెలివైనవి అని చాలా మందికి తెలియదు. కాకుల మెదడులో తెలివితో పాటు మరికొన్ని ఆశ్చర్యకరమైన లక్షణాలు కూడా ఉంటాయని ఇటీవలి అధ్యయనాల్లో తెలిసింది.

శాస్త్రవేత్తల ప్రకారం కాకులకు జ్ఞాపకశక్తి చాలా ఎక్కువ. ఎవరైనా దాన్ని రాయి విసిరి తరిమికొట్టాలని చూస్తే, కాకి అక్కడి నుంచి ఎగిరిపోయి మరో కొమ్మపై కూర్చున్న వెంటనే అదంతా మరచిపోదు. హుష్ హుష్.. అంటూ తనను ఎవరు తరిమికొడుతున్నారో అది ఖచ్చితంగా గుర్తుంచుకుంటుంది.

కాకి మెదడు కోపం, ద్వేషం వంటి వాటిని కూడా నిల్వ ఉంచుకోగలదు. అది కూడా ఒకటి రెండు రోజులు కాదు.. ఏకంగా 17 సంవత్సరాల పాటు మర్చిపోకుండా అలాగే గుర్తుంచుకుంటుందట. సాధారణంగా మనుషులకు ప్రతీకారం తీర్చుకునే స్వభావం ఉంటుంది. కానీ ఈ విషయంలో కాకి మనుషులను మించి పోతుందట.

2006లో జరిగిన ఒక అధ్యయనంలో కాకి మెదడులోని అనేక ఆసక్తికరమైన విషయాలపై పరిశోధనలు ప్రారంభమయ్యాయి. వాషింగ్టన్ విశ్వవిద్యాలయ పరిశోధకులు కాకి మెదడులోని కాగ్నిటివ్ సామర్థ్యాన్ని, అంటే అది ఆలోచించే సామర్థ్యాన్ని పరీక్షించడం ప్రారంభించారు. అప్పుడు తెలిసిన ఆశ్చర్యకరమైన విషయం ఏంటంటే.. కాకి ఒకటి కాదు రెండు కాదు ఏకంగా 17 సంవత్సరాల పాటు దాని కోపాన్ని నిల్వ ఉంచుకుంటుందట.

పర్యావరణ శాస్త్రవేత్త ప్రొఫెసర్ జాన్ మార్జ్‌ల్ఫ్ ఒక ఆసక్తికరమైన విషయాన్ని వెల్లడించారు. తాను 53 కాకులతో ఒక పరీక్ష నిర్వహించానని ఆయన తెలిపారు. ఆ పరీక్షలో, కాకులకు కోపం తెప్పించే ఒక అసహ్యకరమైన సంఘటనను వాటి ముందు చేసినప్పుడు, 53 కాకులలో 47 కాకులు తనను తిరిగి తిట్టాయని ఆయన గుర్తించారు. ఈ పరిశీలన ద్వారానే కాకులు కోపాన్ని నిల్వ ఉంచుకునే సిద్ధాంతం వెలుగులోకి వచ్చిందని ప్రొఫెసర్ మార్జ్‌ల్ఫ్ పేర్కొన్నారు.