AP TS Weather : తెలంగాణలో మరింత పెరగనున్న చలి తీవ్రత, ఏపీకి వర్ష సూచన

తెలంగాణలో  ఉష్ణోగ్రతలు మరింత పడిపోతున్నాయి. విపరీతమైన చలితో ప్రజలు వణికిపోతున్నారు. పగటిపూట కూడా ఉష్ణోగ్రతలు చాలా తక్కువగా ఉంటున్నాయి.

తెలంగాణలో చాలాచోట్ల సాధారణం కంటే 2 డిగ్రీల మేర తక్కువగా నమోదవుతున్నట్టు వాతావరణశాఖ వెల్లడించింది. రాబోయే 3 రోజులు చలి తీవ్రత మరింత పెరిగే అవకాశం ఉందని పేర్కొంది.

తూర్పు, ఆగ్నేయం నుంచి తెలంగాణ వైపు గాలులు వీస్తున్నాయని ఐఎండీ తెలిపింది. ఈ ప్రభావంతో నేడు, రేపు రాష్ట్రంలో పొడి వాతావరణమే ఉండనుంది.

హైదరాబాద్ నగరంలో చూస్తే… శనివారం ఉదయం వేళ పొగమంచు తీవ్రత ఎక్కువగా ఉంది. తూర్పు, ఆగ్నేయం దిశ నుంచి గాలులు ఎక్కువగా వీచే అవకాశం ఉందని హైదరాబాద్ వాతావరణ కేంద్రం తెలిపింది.

ఏపీలో కూడా చలి తీవ్రత ఎక్కువగానే ఉంది. అయితే దక్షిణ కోస్తా ప్రాంతంలో ఇవాళ, రేపు తేలికపాటి నుంచి మోస్తరు వర్షాలు కురిసే అవకాశం ఉందని అమరావతి వాతావరణ కేంద్రం అంచనా వేసింది.

రాయలసీమ ప్రాంతంలో ఇవాళ, రేపు పలు ప్రాంతాల్లో వర్షాలు కురిసే అవకాశం ఉంది. పలుచోట్ల ఉరుములతో కూడిన జల్లులు పడొచ్చని అంచనా వేసింది.