Mega 157: ఉగాది రోజున గ్రాండ్‍గా చిరంజీవి, అనిల్ రావిపూడి సినిమా మొదలు.. స్పెషల్ అట్రాక్షన్‍గా వెంకటేశ్: ఫొటోలు

మెగాస్టార్ చిరంజీవి నయా సినిమా లాంచ్ అయింది. సంక్రాంతికి వస్తున్నాం చిత్రంతో ఈ ఏడాది బ్లాక్‍బస్టర్ సాధించిన అనిల్ రావిపూడితో చిరూ ఈ మూవీ చేస్తున్నారు. ఉగాది పర్వదినమైన నేడు (మార్చి 30) ఈ చిత్రం పూజా కార్యక్రమాలతో మొదలైంది.

అనిల్‍తో సంక్రాంతికి వస్తున్నాం సినిమా చేసి భారీ సక్సెస్ సాధించిన సీనియర్ హీరో విక్టరీ వెంకటేశ్.. మెగా157 (ప్రాజెక్ట్ టైటిల్) మూవీ లాంచ్ ఈవెంట్‍కు అతిథిగా వచ్చారు. క్లాప్ కొట్టి ఈ చిత్రాన్ని ప్రారంభించారు. ఈ ఈవెంట్‍కు వెంకీ స్పెషల్ అట్రాక్షన్‍గా నిలిచారు.

సీనియర్ డైరెక్టర్ రాఘవేంద్ర రావు మెగా157 ప్రాజెక్టు తొలి షాట్‍కు డైరెక్షన్ చేశారు. ప్రముఖ నిర్మాత, చిరంజీవి బావ అల్లు అరవింద్ కెమెరా స్విచ్ ఆన్ చేశారు. స్క్రిప్టు పేపర్లను దర్శకుడు అనిల్‍కు పాపులర్ ప్రొడ్యూజర్లు దిల్‍రాజు, శిరీష్ అందించారు.

మెగా157 పూజా కార్యక్రమానికి డైరెక్టర్లు బాబీ, శ్రీకాంత్ ఓదెల, వంశీ పైడిపల్లి కూడా హాజరయ్యారు. శ్రీకాంత్ ఓదెలతో ఓ చిత్రానికి కూడా చిరూ ఓకే చెప్పారు. బాబీతో గతంలో వాల్తేరు వీరయ్య మూవీ చేశారు చిరూ.

మెగా157 చిత్రం ఫుల్ కామెడీ ఎంటర్‌టైనర్‌గా ఉండనుంది. ఈ మూవీలో వింటేజ్ చిరూని చూస్తారని అనిల్ ఇటీవలే చెప్పారు. ఈ చిత్రాన్ని సాహు గారపాటి, చిరంజీవి కూతురు సుష్మిత కొణిదెల నిర్మిస్తున్నారు. భీమ్స్ సెసిరోలియో సంగీతం అందించనున్నారు.