Nirmala Sitharaman : బడ్జెట్ డే సందర్భంగా కేంద్రమంత్రి నిర్మలా సీతారామన్ చీరలపై ఓ లుక్కేయండి

నిర్మలా సీతారామన్ బహీ ఖతా తరహా పౌచ్‌లో బడ్జెట్ పట్టుకున్నారు. ఊదారంగు అంచులతో అలంకరించిన లేత గోధుమ రంగు చీరను ధరించి, పర్పుల్ బ్లౌజ్‌తో 2024-25 కేంద్ర బడ్జెట్‌కు ముందు ఆర్థిక సర్వేను ప్రవేశపెట్టిన తరువాత ఈ లుక్ కనిపించింది.

కేంద్రమంత్రి నిర్మలా సీతారామన్‌కు చీరలంటే ఎంత ఇష్టమో అందరికీ తెలిసిందే. నిర్మలా సీతారామన్ వరుసగా ఏడోసారి బడ్జెట్‌ను ప్రవేశపెట్టి రికార్డు సృష్టించారు. అయితే ఆమె ఇన్నేళ్లుగా ధరించిన విభిన్నమైన చీరలపై ఓ లుక్కేయండి.

నిర్మలా సీతారామన్ ప్రతి బడ్జెట్ సెషన్‌కు ఇండియన్ టెక్స్‌టైల్స్‌ను ప్రొత్సహించేలా చీరలు ధరిస్తారు. భారతీయ వస్త్రాలు, హస్తకళల పట్ల ఆమెకు ఉన్న అభిమానాన్ని ఇది తెలియజేస్తుంది. తన తొలి బడ్జెట్ సమావేశాలకు సంప్రదాయ బ్రీఫ్ కేస్‌ను పక్కనబెట్టి ఎరుపు రంగు ప్యాకెట్‌లో రిబ్బన్‌తో బడ్జెట్ తీసుకువచ్చారు. బంగారు అంచులతో కూడిన పింక్ మంగళగిరి పట్టుచీరను అప్పుడు ఎంచుకున్నారు.

బడ్జెట్ 2020 కోసం నిర్మలా సీతారామన్ పసుపు రంగు పట్టుచీరను నీలం బోర్డర్‌తో ధరించి వచ్చారు. హిందూ సంస్కృతిలో పసుపును పవిత్రమైన రంగుగా భావిస్తారు. ఇది ఆశ, శ్రేయస్సుకు చిహ్నం. అందువల్ల కోవిడ్ మహమ్మారి సమయంలో ఈ రంగు ఆశావాదాన్ని తెలియజేసింది.

బడ్జెట్ 2021 కోసం నిర్మలా సీతారామన్ తెలంగాణకు చెందిన పోచంపల్లి పట్టుచీరను ధరించారు. ఈ చేనేత చీర విలక్షణమైన ఇకాట్ డిజైన్‌ను కలిగి ఉంది. ఈ ఎంపిక స్థానిక చేతివృత్తులు, భారతీయ నేత సంఘాలకు మద్దతు ఇవ్వాలనే సందేశాన్ని పంపింది.

2022లో ఆర్థిక మంత్రి బొమ్మై చీరను ధరించడం ద్వారా ప్రాంతీయ హస్తకళ, కళను మరింత ప్రోత్సహించారు. మెరూన్, గోల్డ్ బోర్డర్లతో కూడిన గోధుమ రంగు వస్త్రం ఒడిశా చేనేత కార్మికులు తయారు చేశారు. ఒడిశాలోని గంజాం జిల్లా బొమ్మై గ్రామంలో బొమ్మై చీరలను ఉత్పత్తి చేస్తారు.

2023లో ఆర్థిక మంత్రి ఎరుపు రంగు పట్టుచీర ధరించారు. నల్లని అంచు చివరలతో చీర చాలా బాగుంది. ఇది కర్ణాటకలోని ధార్వాడ్ ప్రాంతానికి చెందిన కసుతి ఎంబ్రాయిడరీని ప్రదర్శిస్తాయి.

2024 సంవత్సరానికి గాను నిర్మలా సీతారామన్ ఎరుపు రంగు బహీ ఖతాలో బడ్జెట్ పట్టుకున్నారు. నీలం రంగు తుస్సార్ సిల్క్ చీరతో జత చేసి పశ్చిమ బెంగాల్‌కు చెందిన క్రాఫ్ట్ కాంతా ఎంబ్రాయిడరీతో అలంకరించారు. చేనేత చీరలను ప్రొత్సహించాలని, సాంప్రదాయ నేత పద్ధతులకు మద్దతు ఇవ్వడానికి ఆర్థిక మంత్రి ఇలా చేస్తుంటారు.