Hiccups tips: నీళ్లు తాగినా ఎక్కిళ్లు ఆగట్లేదా? ఇలా చేయండి చాలు

ఎక్కిళ్ళు ఎప్పుడైనా రావచ్చు. కొద్దిగా నీరు తాగిన వెంటనే ఆగిపోవచ్చు. కొన్నిసార్లు మాత్రం ఎక్కిళ్ళు దానంతట అదే ఆగిపోవు. కొన్ని సెకన్ల నుంచి నిమిషాల దాకా ఎక్కిళ్లు రావచ్చు. అతిగా తినడం కూడా దీనికొక కారణమే. 

ఎక్కువ మసాలా ఆహారాలు తినడం, ఆల్కహాల్, సోడా వంటి కార్బోనేటేడ్ పానీయాలు తాగడం, చాలా వేడిగా లేదా చాలా చల్లగా ఉన్న ఆహారాలు తినడం ఎక్కిళ్ళకు కారణమవుతాయి. 
 

నీరు తాగిన తర్వాత కూడా ఎక్కిళ్లు తగ్గకపోతే కాసేపు శ్వాస బిగబట్టుకోడానికి ప్రయత్నించండి. 10 నుంచి 20 సెకన్ల పాటూ శ్వాస తీసుకోకుండా ఆగి మళ్లీ తీసుకోండి. ఇలా కాసేపు చేస్తే ఎక్కిళ్ళు తగ్గుతాయి. 

ఎక్కిళ్లు ఆపడానికి మరో మార్గం ఒక గ్లాసు నీళ్లు తాగడం. అయితే మామూలుగా కాకుండా ముక్కును మూసుకుని నీళ్లు తాగాలి. ఇలా చేస్తే ఎక్కిళ్లు వెంటనే తగ్గుతాయి. 
 

 ఎంత ప్రయత్నించినా ఎక్కిళ్ళు ఆగకపోతే... నిమ్మకాయను కోసి దాని వాసన చూడాలి.ఎక్కిళ్ళు కాసేపటి తర్వాత ఆగిపోతాయి. లేదంటే చెంచాడు పంచదారను నోట్లో వేసుకున్నా వెంటనే ఎక్కిళ్లు ఆగుతాయి. 

లేదంటే ఒక గ్లాసు చల్లటి నీటిలో పంచదారను కరిగించి సిరప్ గా చేసి తాగవచ్చు.ఇవన్నీ ప్రయత్నించినా ఎక్కిళ్లు ఆగవు.అంటే వరుసగా రెండు రోజుల పాటు ఎక్కిళ్లు ఆగకపోతే డాక్టర్ ను సంప్రదించండి.

మీరు బయట ఉన్నప్పుడు ఎక్కిళ్లు వస్తే ఒక చేత్తో మరొక అరచేతిపై తేలికపాటి ఒత్తిడిని వర్తించండి. మరీ గట్టిగా నొక్కడానికి ప్రయత్నించవద్దు. దీనివల్ల ఎక్కిళ్ళు కొంతసేపటి తర్వాత ఆగిపోతాయి.