AP TG Weather Updates : ద్రోణి ఎఫెక్ట్...! తెలంగాణలో4 రోజులపాటు భారీ వర్షాలు

తెలుగు రాష్ట్రాల్లో మరికొన్ని రోజులు వర్షాలు కురిసే అవకాశం ఉంది. ఇప్పటికే ఇరు రాష్ట్రాల్లోని అన్ని ప్రాంతాలకు రుతుపవనాలు విస్తరించాయి. మరో నాలుగైదు రోజులు వానలు కురిసే అవకాశం ఉందని వాతావరణశాఖ తెలిపింది.

ద్రోణి ప్రభావంతో ఇవాళ(జూన్ 22) ఏపీలోని అల్లూరి, ఏలూరు,విజయనగరం,మన్యం, అనకాపల్లి,కాకినాడ,కోనసీమ, తూర్పుగోదావరి,పశ్చిమగోదావరి, కృష్ణా,ఎన్టీఆర్,గుంటూరు,బాపట్ల, పల్నాడు,ప్రకాశం,నెల్లూరు,కర్నూలు, నంద్యాల, వైయస్ఆర్ జిల్లాల్లో అక్కడక్కడ పిడుగులతో కూడిన తేలికపాటి వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ తెలిపింది.

తెలంగాణలో చూస్తే మూడు నాలుగు రోజులు భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం తెలిపింది.

ఇవాళ ఆదిలాబాద్, ఆసిఫిబాద్, మంచిర్యాల, నిర్మల్, పెద్దపల్లి, జయశంకర్ భూపాలపల్లి జిల్లాల్లో ఉరుములు, మెరుపులతో కూడిన భారీ వర్షాలు కురిసే అవకాశం ఉందని హెచ్చరించింది. గాలి వేగం గంటకు 30 -40 కిమీ వేగంతో వీచే అవకాశం ఉందని అంచనా వేసింది. ఆయా జిల్లాలకు ఎల్లో హెచ్చరికలు జారీ అయ్యాయి.
 

నేటి నుంచి జూన్ 25వ తేదీ వరకు తెలంగాణలోని పలు ప్రాంతాల్లో భారీ వర్షాలు కురిసే అవకాశం ఉంది. ఇక 26, 27 తేదీల్లో తేలికపాటి నుంచి మోస్తారు వర్షాలు కురిసే ఛాన్స్ ఉందని అంచనా వేసింది.

వచ్చే వారం నుంచి తెలంగాణ వ్యాప్తంగా భారీ వర్షాలు కురిసే అవకాశం ఉందని వాతావరణశాఖ అంచనా వేస్తోంది. విత్తనాలు వేసిన రైతులు… వానల కోసం ఎదురుచూస్తున్న సంగతి తెలిసిందే.