AP TG Rain ALERT : బంగాళాఖాతంలో అల్పపీడనం - ఆపై వాయుగుండం..! కోస్తా, సీమ జిల్లాలకు భారీ వర్ష సూచన

ఆగ్నేయ బంగాళాఖాతంలో అల్పపీడనం ఏర్పడింది. ఇది పశ్చిమ వాయువ్య దిశగా పయనిస్తూ దక్షిణ బంగాళాఖాతంలో నవంబర్ 25 నాటికి వాయుగుండం మారే అవకాశం ఉందని ఐఎండీ తెలిపింది.
 

వాయుగుండం ఏర్పడిన తర్వాత వాయువ్య దిశగా కదులుతూ తదుపరి  రెండు రోజుల్లో తమిళనాడు - శ్రీలంక తీరాలవైపు వెళ్లే అవకాశం ఉందని వాతావరణశాఖ అంచనా వేసింది.

ఇవాళ, రేపు ఏపీలో వాతావరణం పొడిగానే ఉండే అవకాశం ఉందని అమరావతి వాతావరణ కేంద్రం తెలిపింది.  నవంబర్ 26 నుంచి ఏపీలో వర్షాలు కురుస్తాయని పేర్కొంది.
 

నవంబర్ 27, 28, 29 తేదీల్లో ఉత్తర, దక్షిణ కోస్తాతో పాటు రాయలసీమ జిల్లాల్లోని పలు చోట్ల భారీ వర్షాలు కురిసే అవకాశం ఉంటుందని ఐఎండీ పేర్కొంది. మిగిలినచోట్ల అక్కడక్కడ తేలికపాటి నుంచి మోస్తారు వర్షాలు కురిసే అవకాశం ఉంది.
 

రైతులు వ్యవసాయ పనుల్లో తగిన జాగ్రత్తలు తీసుకోవాలని ఏపీ విపత్తుల నిర్వహణ సంస్థ విజ్ఞప్తి చేసింది. ప్రజలు అప్రమత్తంగా ఉండాలని హెచ్చరించింది.
 

తెలంగాణలో మళ్లీ వర్షాలు కురిసే అవకాశం ఉంది. ఈ మేరకు హైదరాబాద్ వాతావరణ కేంద్రం కీలక అప్డేట్ ఇచ్చింది. తెలంగాణలో నవంబర్ 29వ తేదీ నుంచి తేలికపాటి నుంచి మోస్తారు వర్షాలు కురిసే అవకాశం ఉంది. 

ఇవాళ్టి నుంచి నవంబర్ 28వ తేదీ వరకు కూడా పూర్తిగా పొడి వాతావరణమే ఉండనుందని హైదరాబాద్ వాతావరణ కేంద్రం తెలిపింది.

నవంబర్ 28వ తేదీ వరకు ఎలాంటి వర్ష సూచన లేదని, ఎలాంటి హెచ్చరికలు కూడా లేవని హైదరాబాద్ వాతావరణ కేంద్రం పేర్కొంది. మరోవైపు తెలంగాణలో చలి తీవ్రత ఎక్కువగా ఉంది. శనివారం (నవంబర్ 23) ఉదయం మెదక్ లో 11. 4 సెల్సియస్‌ డిగ్రీలు నమోదైంది.