వివాహేతర బంధాన్ని పసిగట్టిన చాట్​జీపీటీ! భర్తకు విడాకులు ఇస్తున్న మహిళ- అసలేం జరిగిందంటే..

గ్రీస్​లో జరిగిన ఒక ఘటన ఇప్పుడు సోషల్​ మీడియాలో వైరల్​గా మారింది! కాఫీ కప్పు ఫొటోలు చూసి 'నీ భర్తకు వివాహేతర సంబంధం ఉంది' అని చాట్​జీపీటీ చెప్పడంతో సదరు మహిళ, తన భర్తకు విడాకులు ఇస్తోంది!

అసలేం జరిగిందంటే..

పురాతన కాలంలో టాస్సియోగ్రఫీ అనే పద్ధతితో భవిష్యత్తును ప్రెడిక్ట్​ చేసేవారు. టీ ఆకుల పాటర్న్​, తాగేసిన కాఫీ లేదా వైన్​ కప్పుల్లో కనిపించే చిహ్నాల ఆధారంగా భవిష్యత్తులో ఏం జరగొచ్చు అనేది చెప్పేవారు.

ఇక ఇప్పుడు గ్రీస్​కి చెందిన ఒక మహిళ.. చాట్​జీపీటీలో ఈ టాస్సియోగ్రఫీని ప్రయత్నించింది. చాట్​జీపీటీలో రెండు కాఫీ కప్పుల ఫొటోలను అప్లోడ్​ చేసింది. 'నా భర్త కాఫీ కప్పును చూసి, అతనికి ఏదైనా అఫైర్​ ఉందా?' అని చెప్పమంది.

ఆ కాఫీ కప్పు చూసిన చాట్​జీపీటీ.. 'ఓ మహిళతో నీ భర్తకు వివాహేతర సంబంధం ఉంది. ఆమె వల్ల నీ కుటుంబం చీలిపోతుంది,' అని బదులిచ్చిందట.

"'ఈ' అనే ఇనీషియల్​ ఉన్న ఒక మహిళతో నీ భర్త గడుపుతాడు," అని చాట్​జీపీటీ సమాధానం ఇచ్చింది.

చాట్​జీపీటీ చెప్పడంతో 12ఏళ్ల వివాహ బంధంపై ఆ గ్రీస్​ మహిళకు డౌట్లు మొదలయ్యాయి. ఇదే విషయాన్ని తన భర్తకు చెప్పి నిలదీసింది. ముందు అది విన్న ఆ వ్యక్తి నవ్వుకున్నాడు. ఇదేమీ పెద్ద సీరియస్​ విషయం కాదనుకున్నాడు. కానీ కొన్ని రోజులకు భార్య నుంచి ఆయనకు విడాకుల నోటీసులు వచ్చాయి. అప్పుడే దీని తీవ్రతను అతను అర్థం చేసుకున్నాడు.

"ఇది నాన్​సెన్స్​ అనుకుని నవ్వుకున్నాను. కానీ నా భర్య దీన్ని చాలా సీరియస్​గా తీసుకుంది. నన్ను వెళ్లిపోమంది. విడాకులు తీసుకుంటున్నట్టు పిల్లలకు చెప్పింది. ఆ తర్వాత లాయర్​ నుంచి నాకు కాల్​ వచ్చింది. ఇది జోక్​ కాదని, చాలా సీరియస్​ విషయం అని అప్పుడే నాకు అర్థమైంది," అని ఓ స్థానిక టీవీ షోకు వెళ్లిన ఆ మహిళ భర్త చెప్పాడు.

అయితే, తన భార్య ఇలా ప్రవర్తించడం ఇది కొత్తేమీ కాదని ఆ వ్యక్తి చెప్పుకొచ్చాడు.

"కొన్నేళ్ల క్రితం ఆమె ఓ జ్యోతిష్కుడి దగ్గరికి వెళ్లింది. అతను ఏదేదో చెప్పాడు. ఆమె నమ్మేసింది. అవన్నీ వట్టి మాటలే అని ఆమెకు అర్థం అవ్వడానికి ఏడాది కాలం పట్టింది," అని అన్నాడు.

ఈ విషయంపై ఆ మహిళ భర్త తరపున వాదిస్తున్న న్యాయవాది స్పందించాడు.

"చాట్​జీపీటీలో కాఫీ రీడింగ్​ ఫలితాలను చూసి వివాహేతర సంబంధం ఉందని చెప్పడం లీగల్​గా చెల్లదు. నిజమైన ఆధారాలు బయటకు వచ్చేంత వరకు నా క్లైయింట్​ అమాయకుడు," అని స్పష్టం చేశాడు.

ఈ వ్యవహారం ఇప్పుడు సోషల్​ మీడియాకి ఎక్కింది. చాలా మంది మహిళ ప్రవర్తనకు షాక్​ అవుతున్నారు. ఇంకొందరు మాత్రం.. ఆమె భర్తకు నిజంగా వివాహేతర సంబంధం ఉందా? లేదా? అనేది తెలుసుకునేందుకు కుతుహలం వ్యక్తం చేస్తున్నారు.