Grounds for Divorce: భార్య హస్త ప్రయోగం చేయడం, పోర్న్ చూడటం కారణాలుగా విడాకులు ఇవ్వలేం: మద్రాస్ హైకోర్టు

Grounds for Divorce: జీవిత భాగస్వామి పోర్న్ చూడటం, హస్త ప్రయోగం చేసుకోవడం వైవాహిక బంధంలో 'క్రూరత్వం' కిందకు రావని మద్రాస్ హైకోర్టు స్పష్టం చేసింది. తన భార్య అశ్లీల చిత్రాలను చూస్తుందని, తరచూ హస్తప్రయోగం చేస్తుందనే కారణంతో ఆమె నుంచి విడాకులు కోరుతూ ఓ వ్యక్తి దాఖలు చేసిన పిటిషన్ ను మద్రాస్ హైకోర్టు తోసిపుచ్చింది. మహిళ లైంగిక స్వయంప్రతిపత్తిని నిర్ధారిస్తూ, గోప్యత ప్రాథమిక హక్కులో వ్యక్తిగత గోప్యత కూడా భాగమేనని హైకోర్టు తేల్చి చెప్పింది.

అది చట్టాల ఉల్లంఘన కాదు..

పోర్నోగ్రఫీ చూడటంలో భార్యాభర్తలు చట్టబద్ధమైన చట్టాలను ఉల్లంఘించకపోతే, అటువంటి అలవాటు ఒకరి దాంపత్య బాధ్యతల నిర్వహణపై ప్రతికూల ప్రభావాన్ని చూపకపోతే, అటువంటి చర్యలు క్రూరత్వంగా పరిగణించబడవని, అందువల్ల అవి విడాకులకు కారణం కాజాలవని మద్రాసు హైకోర్టు మదురై బెంచ్ న్యాయమూర్తులు జస్టిస్ జిఆర్ స్వామినాథన్, జస్టిస్ ఆర్ పూర్ణిమ అభిప్రాయపడ్డారు.

అశ్లీల చిత్రాలు చూడటం నేరం కాదు

ప్రైవేట్ వాతావరణంలో అశ్లీల చిత్రాలు చూడటం నేరం కాదని ఈ సందర్భంగా కోర్టు అభిప్రాయపడింది. తన భార్య తరచూ హస్తప్రయోగానికి పాల్పడుతోందనే భర్త వాదనపై కోర్టు స్పందిస్తూ.. పురుషుల్లో హస్తప్రయోగం సార్వజనీనమని అంగీకరించినప్పుడు, మహిళలు హస్త ప్రయోగం చేయడాన్ని తప్పుగా చూడకూడదని వ్యాఖ్యానించింది. ‘‘పెళ్లి చేసుకున్న తర్వాత, ఆ మహిళ వివాహానికి వెలుపల లైంగిక సంబంధం పెట్టుకుంటే అది విడాకులకు కారణం కావచ్చు. హస్త ప్రయోగం ద్వారా స్వీయ ఆనందం పొందడం వివాహం రద్దు కావడానికి కారణంగా నిర్ధారించలేం. ఇది భర్తపై క్రూరత్వాన్ని ప్రేరేపిస్తుందని చెప్పలేం’’ అని హైకోర్టు వ్యాఖ్యానించింది. వివాహానంతరం కూడా స్త్రీ తన వ్యక్తిత్వాన్ని నిలుపుకుంటుందని, ఒక వ్యక్తిగా ఆమె ప్రాథమిక గుర్తింపు "ఆమె వైవాహిక స్థితికి లోబడి లేదు" అని పేర్కొంది.

తమిళనాడు వ్యక్తి

తమిళనాడులోని కరూర్ జిల్లాకు చెందిన ఓ వ్యక్తి తన భార్య నుంచి విడాకులు ఇవ్వడానికి నిరాకరించిన ఫ్యామిలీ కోర్టు ఉత్తర్వులను సవాలు చేస్తూ దాఖలు చేసిన పిటిషన్ పై విచారణ సందర్భగా మద్రాసు హైకోర్టు పై వ్యాఖ్యలు చేసింది. తన భార్యకు బాగా డబ్బు ఖర్చు చేసే అలవాటు ఉందని, పోర్న్ చూడటానికి బానిసైందని, ఇంటి పనులు చేయడానికి నిరాకరిస్తుందని, తరచూ హస్తప్రయోగానికి పాల్పడుతుందని ఆ వ్యక్తి ఆరోపించారు. తన భార్య లైంగిక సంబంధ వ్యాధితో బాధపడుతోందని పిటిషనర్ ఆరోపించారు. అయితే, ఆ మహిళ లైంగిక వ్యాధితో బాధపడుతున్నట్లు నిర్ధారించడానికి ఆ వ్యక్తి ఎటువంటి పత్రాలను సమర్పించలేదు.

2018 జులైలో వివాహం

2018 జులైలో వీరి వివాహం జరిగింది. అయితే 2020 డిసెంబర్ నుంచి విడివిడిగా ఉంటున్నారు. ఆ తర్వాత భార్య దాంపత్య హక్కులను పునరుద్ధరించాలని కోరగా, భార్య అశ్లీల చిత్రాలు చూడటం, హస్తప్రయోగం చేయడం ద్వారా తనపై క్రూరత్వం ప్రదర్శిస్తోందని ఆరోపిస్తూ భర్త క్రూరత్వంతో విడాకుల కోసం పిటిషన్ దాఖలు చేశాడు.