పాకిస్తాన్ గుట్టు విప్పిన కల్నల్ సోఫియా ఖురేషి, వింగ్ కమాండర్ వ్యోమికా సింగ్ ఎవరు?

Operation Sindoor: పహల్గామ్ ఉగ్రదాడి తర్వాత భారత సైన్యం మంగళవారం అర్ధరాత్రి పాకిస్తాన్, పిఓకేలలోని 9 ఉగ్రవాద స్థావరాలపై వైమానిక దాడులు చేసి ధ్వంసం చేసింది. ఈ ఆపరేషన్‌కు ఆపరేషన్ సింధూర్ అని పేరు పెట్టారు.

ఈ వైమానిక దాడిలో దాదాపు 90 మంది పాకిస్తాన్ ఉగ్రవాదులు హతమయ్యారని సమాచారం. బుధవారం ఉదయం ఆపరేషన్ సింధూర్ గురించి సమాచారం ఇవ్వడానికి భారత సైన్యం తమ ఇద్దరు ధైర్యవంతులైన మహిళా అధికారులను ముందుకు తెచ్చింది. వారిలో ఒకరు వైమానిక దళ వింగ్ కమాండర్ వ్యోమికా సింగ్, మరొకరు భారత సైన్యానికి చెందిన కల్నల్ సోఫియా ఖురేషి.

ఇద్దరూ కలిసి పాకిస్తాన్ గుట్టును రట్టు చేశారు. సైన్యం దాడులు చేసి పాక్‌లో నడుస్తున్న ఉగ్రవాద కర్మాగారాలను ఎలా నాశనం చేసిందో వివరించారు. సోఫియా భారత సైన్యంలో లెఫ్టినెంట్ కల్నల్ హోదాలో ఉన్నారు. వ్యోమికా సింగ్ భారత వైమానిక దళంలో వింగ్ కమాండర్ గా ఉన్నారు.

కల్నల్ సోఫియా ఖురేషి చాలా కాలంగా ధైర్యానికి, పురోగతికి చిహ్నంగా నిలిచారు. పూణేలో జరిగిన సైనిక విన్యాసం-ఎక్సర్‌సైజ్ ఫోర్స్ 18-లో భారత సైనిక దళానికి నాయకత్వం వహించిన తొలి మహిళా అధికారిగా ఆమె చరిత్ర సృష్టించారు.

పాకిస్తాన్ గుట్టు విప్పుతూ, పాకిస్తాన్‌లో మూడు దశాబ్దాలుగా ఉగ్రవాదానికి సంబంధించిన నిర్మాణాలు జరుగుతున్నాయని, అవి పాక్, పిఓకేలలో విస్తరించి ఉన్నాయని ఆమె చెప్పారు.

పహల్గామ్‌లో జరిగిన ఉగ్రదాడిలో మరణించిన అమాయక పౌరులకు న్యాయం చేయడానికి భారత సైన్యం ఆపరేషన్ సింధూర్‌ను ప్రారంభించి, తొమ్మిది ఉగ్రవాద శిబిరాలను లక్ష్యంగా చేసుకుని వాటిని నాశనం చేసింది.

వ్యోమికా సింగ్ గురించి

వింగ్ కమాండర్ వ్యోమికా సింగ్ గురించి చెప్పాలంటే, ఆమె చిన్నప్పటి నుండి భారత వైమానిక దళంలో చేరాలని కోరుకున్నారు. ఆమె భారత వైమానిక దళంలో హెలికాప్టర్ పైలట్. భారత వైమానిక దళ పైలట్‌గా ప్రమాదకర ప్రాంతాల్లో విమానాలు నడిపిన అనుభవం ఆమెకు చాలా ఉంది.

ఇప్పటి వరకు ఆమె రెండున్నర వేలకు పైగా గంటల విమాన అనుభవం సంపాదించారు. వ్యోమికా ఈశాన్య భారత రాష్ట్రాలు, జమ్మూ కాశ్మీర్ వంటి కష్టతరమైన ప్రాంతాల్లో చీతా, చేతక్ వంటి హెలికాప్టర్లను నడిపారు.

ఆమె అనేక రెస్క్యూ మిషన్లను కూడా విజయవంతంగా పూర్తి చేశారు. నవంబర్ 2020లో ఆమె అరుణాచల్ ప్రదేశ్‌లో చాలా కష్టమైన మిషన్‌కు నాయకత్వం వహించి ప్రజల ప్రాణాలను కాపాడారు.

వింగ్ కమాండర్ వ్యోమికా సింగ్ విలేకరుల సమావేశంలో మాట్లాడుతూ, "పహల్గామ్ ఉగ్రదాడి బాధితులకు, వారి కుటుంబాలకు న్యాయం చేయడానికి భారత సాయుధ దళాలు ఆపరేషన్ సింధూర్ చేపట్టాయి. తొమ్మిది ఉగ్రవాద శిబిరాలను లక్ష్యంగా చేసుకుని విజయవంతంగా ధ్వంసం చేశాయి. పౌర మౌలిక సదుపాయాలకు నష్టం జరగకుండా, పౌరుల ప్రాణాలకు హాని కలగకుండా జాగ్రత్తలు తీసుకున్నారు" అని వివరించారు.