US Executive Orders : అమెరికా అధ్యక్షుడి చేతిలో 'ఎగ్జిక్యూటివ్ ఆర్డర్' ఆయుధం.. ఇంతకీ ఏంటి ఈ పవర్ఫుల్ విధానం?
US President Executive Power : డోనాల్డ్ ట్రంప్ అధ్యక్షుడైన వెంటనే ఎగ్జిక్యూటివ్ ఉత్తర్వులను జారీ చేస్తానని హామీ ఇచ్చిన విషయం తెలిసిందే. బిడెన్ పరిపాలనలోని వినాశకరమైన ఆదేశాలను రద్దు చేస్తానని ట్రంప్ గతంలో కామెంట్స్ చేశారు. ఇంతకీ ఈ విధానం ఏంటి?
అమెరికా 47వ అధ్యక్షుడిగా డొనాల్డ్ ట్రంప్ బాధ్యతలు చేపట్టారు. తాను బాధ్యతలు స్వీకరించిన వెంటనే కార్యనిర్వాహక ఉత్తర్వులు జారీ చేస్తానని గతంలో చెప్పారు. దీని ద్వారా అమెరికా విధానాన్ని రూపుదిద్దుతామని హామీ ఇచ్చారు. బిడెన్ అడ్మినిస్ట్రేషన్ జారీ చేసిన విధ్వంసక మరియు రాడికల్ ఆర్డర్లను రద్దు చేస్తానని ట్రంప్ అన్నారు. ఇంతకీ ఈ ఎగ్జిక్యూటివ్ ఆర్డర్లు ఏంటో చూద్దాం..
చట్టబద్ధత ఉంటుంది
అమెరికా అధ్యక్షుడు ఏకపక్షంగా జారీ చేసేది ఎగ్జిక్యూటివ్ ఆర్డర్. ఇవి చట్టాల వలె ప్రభావవంతంగా ఉంటాయి. ట్రంప్ తన మొదటి పదవీకాలంలో అనేక ఆర్డర్స్ కూడా జారీ చేశారు. ట్రంప్ తన మొదటి పదవీకాలంలో 220 కార్యనిర్వాహక ఉత్తర్వులు జారీ చేశారు. జిమ్మీ కార్టర్ తర్వాత నాలుగేళ్లలో ఒకే ఒక్క అధ్యక్షుడు ఇచ్చిన అత్యధిక ఎగ్జిక్యూటివ్ ఆర్డర్స్ ఇవే. జో బిడెన్ తన పదవీకాలంలో 160 వరకు కార్యనిర్వాహక ఉత్తర్వులు జారీ చేశారు.
ఎప్పుడైనా అమల్లోకి రావొచ్చు
ఎగ్జిక్యూటివ్ ఆర్డర్పై రాష్ట్రపతి సంతకం చేసిన తర్వాత, అది తక్షణం లేదా చాలా నెలల తర్వాత అమలులోకి రావచ్చు. ఇది ఫెడరల్ ఏజెన్సీ నుండి అధికారిక చర్య అవసరమా అనే అంశాన్ని పరిశీలించే దానిపై ఆధారపడి ఉంటుంది. ఉదాహరణకు ట్రంప్ ముస్లింలపై ట్రావెల్ బ్యాన్ విధించినప్పుడు అది వెంటనే అమల్లోకి వచ్చింది. ఎందుకంటే ఇది 1952 నాటి ఫెడరల్ చట్టాన్ని అమలు చేసింది.
అధ్యక్షుడు జారీ చేసే ఆర్డర్స్
అమెరికా చట్ట సభ ఆమోదం లేకుండా ప్రభుత్వానికి అధ్యక్షుడు జారీ చేసే లిఖితపూర్వక ఆదేశాలను ఎగ్జిక్యూటివ్ ఆర్డర్స్ అంటారు. ఈ ఆదేశాలకు చట్టబద్ధత ఉంటుంది. అయితే ఇక్కడ గుర్తుంచుకోవాల్సిన మరో విషయం ఏంటంటే.. సాధారణంగా జారీ చేసే అధికారిక ప్రకటనలకు చట్టబద్ధత ఉండదు.
ఇక్కడ మరో ఆసక్తికరమైన విషయం ఏంటంటే.. ఎగ్జిక్యూటివ్ ఆదేశాలను తిరస్కరించే చట్టాన్ని తీసుకొచ్చే అవకాశం కాంగ్రెస్కు ఉంటుంది. దానిపై విటో అధికారం మాత్రం అధ్యక్షుడిదే. అందుకోసమే కాంగ్రెస్ ఆమోదించదనే అంశాలను అధ్యక్షడు తమ అజెండాలో పెట్టుకుంటారు. కానీ నిధుల విషయంలో కాంగ్రెస్ దీనికి అడ్డంకులు సృష్టించవచ్చు.
యూఎస్ సుప్రీం కోర్ట్ అబార్షన్పై పరిమితులను అనుమతించినప్పుడు, అధ్యక్షుడు జో బిడెన్ అబార్షన్ యాక్సెస్ను రక్షించడానికి చర్య తీసుకోవాలని ఆరోగ్య సంస్థలను ఆదేశించారు. ఈ ఆర్డర్ తక్షణ ప్రభావం చూపలేదు. కానీ ఏజెన్సీలు అబార్షన్ ప్రొవైడర్ల గోప్యతను రక్షించే నిబంధనలను కొన్ని నెలల్లో అమలులోకి తెచ్చాయి.
అడ్డుకునే అధికారం ఉంటుందా?
ది హెరిటేజ్ ఫౌండేషన్ ఆఫ్ అమెరికా ప్రకారం.. కాంగ్రెస్, ఫెడరల్ కోర్టులు అధ్యక్షుడి అధికార పరిధిని మించిన ఎగ్జిక్యూటివ్ ఆర్డర్స్ను రద్దు చేయవచ్చు. 2017లో ట్రంప్ ఎగ్జిక్యూటివ్ ఆర్డర్ను న్యాయమూర్తి అడ్డుకున్నారు. అదే సమయంలో 2023లో జో బిడెన్ ఫెడరల్ ఉద్యోగులను తప్పనిసరిగా కోవిడ్-19 వ్యాక్సిన్ పొందాలని ఆదేశించినప్పుడు, కోర్టు ఈ ఉత్తర్వును ఆపేసింది. ఇది హక్కుల ఉల్లంఘన అని పేర్కొంది.
అధ్యక్ష బాధ్యతలు చేపట్టిన మెుదటిరోజే వందకుపైగా ఎగ్జిక్యూటివ్ ఆర్డర్స్ మీద సంతకాలు చేస్తానని ట్రంప్ చెప్పారు. అయితే చట్టపరిధిని దాటితే మాత్రం న్యాయపరమైన చిక్కులు ఎదురుకునే అవకాశం ఉంటుంది.