Different types of US visas: అమెరికా వెళ్లడానికి ఎన్ని రకాల వీసాలున్నాయో తెలుసా?
US visa: అమెరికా వెళ్లాలనుకుంటున్నారా? అక్కడికి వెళ్లడానికి ఎన్ని వీసా (visa) కేటగిరీలున్నాయో తెలుసా? మీ ప్రయాణ అవసరాన్ని బట్టి వీసా కేటగిరీలు మారుతుంటాయి.
ట్రెండింగ్ వార్తలు
US tourist visa: టూరిస్ట్ వీసా B-2
అమెరికా పర్యటించే వారికి ఆ దేశం బీ2 (B-2) వీసా ఇస్తుంది. వైద్యం, విహారం, వినోదం కోసం అమెరికా వెళ్లే వారికి ఆ వీసా లభిస్తుంది. బీ 2(B-2) వీసా పొందాలంటే మీరు అమెరికాలో కొద్ది రోజులే ఉండబోతున్నారని, మీ ట్రిప్ పూర్తి చేయడానికి అవసరమైన డబ్బులు మీ దగ్గర ఉన్నాయని, యూఎస్ లో హోటల్ రిజర్వేషన్ ఉందని, తిరుగుప్రయాణ టికెట్లు తీసుకున్నారని నిర్ధారించాల్సి ఉంటుంది. ఇది సాధారణంగా 6 నెలల వ్యాలిడిటీతో ఇస్తారు. అవసరమైతే, మరో ఆరు నెలలు పొడగిస్తారు.
US student visa: స్టుడెంట్ వీసా F-1
అమెరికాలోని విద్యా సంస్థల్లో చదువుకోవడానికి వెళ్లాలనుకునే వారికి ఈ వీసా(F-1) ను ఇస్తారు. ఈ వీసాను పొందడానికి ముందుగా, మీకు అమెరికాలోని విద్యా సంస్థల్లో అడ్మిషన్ లభించి ఉండాలి. అందుకుగానూ, సంబంధిత విద్యా సంస్థ నుంచి అందిన ఐ 20 (I-20) మీ వద్ద సిద్ధంగా ఉండాలి. కోర్సు పూర్తి చేయడానికి, కోర్సు పూర్తయ్యే వరకు యూఎస్ లో ఉండడానికి అవసరమైన డబ్బులు సిద్ధంగా ఉన్నట్లు చూపించాలి. ఈ వీసా (F-1) కాలపరిమితి సాధారణంగా కోర్సు ఎన్ని సంవత్సరాలు ఉంటుందో, అన్ని సంవత్సరాలు ఉంటుంది. ఆ తరువాత, తిరిగి రావడానికి అవసరమైన ఏర్పాటు చేసుకోవడానికి మరో రెండు నెలల సమయం ఇస్తారు.
US temporary work visa: నిపుణులైన ఉద్యోగులకు ఇచ్చే వీసా H-1B
ఇది టెంపరరీ వర్క్ వీసా. ఇంజినీరింగ్, సైన్స్, కంప్యూటర్ ప్రొగ్రామింగ్ తదితర వివిధ నైపుణ్యాలున్న ఉద్యోగులు అమెరికాలో జాబ్ చేయడం కోసం ఈ వీసా (H-1B) అవసరం. ఈ వీసా పొందాలంటే అమెరికాలోని కంపెనీ నుంచి జాబ్ ఆఫర్ ఉండాలి. మీరు జాబ్ చేసే ఫీల్డ్ లో కనీసం బ్యాచిలర్ డిగ్రీ ఉండాలి. 3 సంవత్సరాల కాలపరిమితితో ఈ వీసా (H-1B) ఇస్తారు. అవసరమైతే, మరో మూడేళ్లు పొడగిస్తారు.
US temporary work visa: ట్రాన్స్ ఫర్ అయిన ఉద్యోగులకు ఇచ్చే వీసా L-1
ఇది కూడా తాత్కాలిక వర్క్ వీసానే. విదేశాల్లోని తమ కంపెనీ బ్రాంచ్ లేదా తమ అఫిలియేటెడ్ కంపెనీ నుంచి అమెరికాలోని బ్రాంచ్ లేదా మెయిన్ ఆఫీస్ కు బదిలీ అయిన ఉద్యోగులకు ఇచ్చే వీసా (L-1) ఇది. ఈ వీసా పొందాలంటే సంబంధిత కంపెనీలో కనీసం ఒక సంవత్సరం జాబ్ చేసి ఉండాలి. అలాగే, ఆ కంపెనీ నుంచి మేనేజీరియల్ లేదా ఎగ్జిక్యూటివ్ హోదాలో అమెరికాలో జాబ్ చేయడానికి రావాలి. ఈ వీసా (L-1) కాల పరిమితి మేనేజీరియల్ లేదా ఎగ్జిక్యూటివ్ హోదా సాధారణంగా ఏడేళ్లు, నిపుణులైన ఇతర ఉద్యోగులకు ఐదేళ్లు ఉంటుంది.
US Business visa: వ్యాపారవేత్తలకు ఇచ్చే వీసా E-2
వ్యాపార వేత్తలకు, అంట్రాప్రన్యూర్స్(ఔత్సాహిక పారిశ్రామిక వేత్తలకు) ఈ E-2 వీసా ఇస్తారు. అమెరికాలో బిజినెస్ లలో పెట్టుబడులు పెట్టేవారికి, ఇప్పటికే పెట్టుబడి పెట్టిన సంస్థలను నిర్వహించడానికి వచ్చే వారికి ఈ E-2 వీసా ఇస్తారు. యూఎస్ లోని వ్యాపారాల్లో గణనీయమైన పెట్టుబడి పెట్టినవారికి లేదా అమెరికాతో వ్యాపార సంబంధ ఒప్పందాలు కుదుర్చుకున్న దేశాల వారికి ఈ E-2 వీసా ఇస్తారు. ఈ E-2 వీసాను మొదట ఐదేళ్ల కాల పరిమితితో ఇస్తారు. ఆ తరువాత యూఎస్ లో వ్యాపారం కొనసాగిస్తున్నంత కాలం వీసా కాల పరిమితిని పొడగించుకోవచ్చు.
US Exchange program visa: ఎక్స్ చేంజ్ ప్రొగ్రామ్ కోసం J-1 వీసా
ఇది ఎక్స్ చేంజ్ విజిట్ వీసా. అమెరికా తో ఎక్స్ చేంజ్ ప్రొగ్రామ్ లో భాగంగా వస్తున్నవారికి జే 1 (J-1) వీసా ఇస్తారు. అలాగే, ఆర్ట్స్, సైన్స్, అథ్లెటిక్స్ లో అసాధారణ ప్రతిభ ఉన్నవారికి O-1 వీసాను, ఎంటర్ టైన్ మెంట్ ప్రొగ్రామ్స్ లో, క్రీడా కార్యక్రమాల్లో పాల్గొనడానికి యూఎస్ వస్తున్నవారికి P-1 వీసాను అందిస్తారు.
