H-1B Visa : హెచ్​-1బీ వీసాదారులకు భారీ ఉపశమనం- వేలాది మంది భారతీయులకు గుడ్​ న్యూస్​!-us plans new move on h 1b visa will benefit thousands of indian techies and more ,జాతీయ - అంతర్జాతీయ న్యూస్
తెలుగు న్యూస్  /  జాతీయ - అంతర్జాతీయ  /  H-1b Visa : హెచ్​-1బీ వీసాదారులకు భారీ ఉపశమనం- వేలాది మంది భారతీయులకు గుడ్​ న్యూస్​!

H-1B Visa : హెచ్​-1బీ వీసాదారులకు భారీ ఉపశమనం- వేలాది మంది భారతీయులకు గుడ్​ న్యూస్​!

Sharath Chitturi HT Telugu
Feb 10, 2023 04:18 PM IST

H-1B Visa news : హెచ్​-1బీ వీసా రీవాలిడేషన్​ ప్రక్రియను అమెరికా మొదలుపెట్టాలని చూస్తోంది. ఇదే జరిగితే వేలాది మంది భారతీయులకు ఊరట లభించనుంది.

హెచ్​-1బీ విసా విషయంలో భారతీయులకు గుడ్​ న్యూస్​
హెచ్​-1బీ విసా విషయంలో భారతీయులకు గుడ్​ న్యూస్​

H-1B Visa news : హెచ్​-1బీ వీసా అంశంలో అమెరికా ప్రభుత్వం మరో కీలక నిర్ణయం తీసుకోనుంది! కొన్ని ఎంపిక చేసిన కేటగిరీల్లో 'డొమెస్టిక్​ వీసా రీవాలిడేషన్​' ప్రక్రియను తిరిగి ప్రారంభించాలని చూస్తోంది. ఇదే జరిగితే.. హెచ్​1బీ, ఎల్​1 వీసాల విషయంలో వేలాది మంది భారతీయులతో పాటు విదేశీయులు లబ్ధిపొందనున్నారు.

హెచ్​-1బీ వీసా రీవాలిడేషన్​..

పైలట్​ ప్రాజెక్టులో భాగంగా వీసా రీవాలిడేషేన్​ ప్రక్రియను చేపట్టాలని యూఎస్​ చూస్తోంది. ఈ ఏడాది రెండో భాగంలో ఇది లాంచ్​ అవ్వొచ్చు. పూర్తిస్థాయిలో దీనిని అమలు చేస్తే.. అమెరికాలోని భారతీయ టెక్​ నిపుణులకు భారీ ఊరట లభిస్తుంది.

H-1B Visa revalidation : 2004 వరకు హెచ్​-1బీ వంటి.. కొన్ని కేటగిరీల్లోని నాన్​ ఇమిగ్రెంట్​ వీసాలను అమెరికాలోపలే రెన్యూ/ స్టాంప్​ చేయించుకునే వెసులుబాటు ఉండేది. ఆ తర్వాత నుంచి.. ఆయా వీసాలను రెన్యూ చేయించుకోవాలంటే.. సంబంధిత వీసాదారులు దేశం నుంచి బయటకు వెళ్లాల్సి వస్తోంది. సొంత దేశాలకు తిరిగి వెళ్లి, అక్కడ పాస్​పోర్టుల మీద ఎక్స్​టెన్షన్​ స్టాంప్​ వేయించుకోవాల్సి వస్తోంది.

అయితే.. ఈ ప్రక్రియ అంత సులభమైనది కాదు. చాలా మంది అమెరికాను వీడి, సోంత దేశాలకు తిరిగి వెళతారు. కానీ అక్కడ స్టాంపింగ్​ ప్రక్రియ పూర్తవడానికి చాలా కాలం పడుతోంది. అన్ని డాక్యుమెంట్లు సమర్పించినప్పటికీ.. ఒక్కోసారి రెండేళ్ల కన్నా ఎక్కువ సమయమే పడుతుంది. ఇంతలో సంబంధిత కుటుంబాలు అమెరికాలో ఒంటరిగా ఉండిపోతున్నాయి. దీనిపై ఆందోళన వ్యక్తం చేసిన ప్రెసిడెన్షియల్​ కమిషన్​.. వీసా రీవాలిడేషన్​ ప్రక్రియను ప్రారంభించాలని గత కొన్నేళ్లుగా అభ్యర్థిస్తూ వస్తోంది.

Indians H-1B Visa : ప్రస్తుతానికి అమెరికాలో హెచ్​-1బీ వీసా రీస్టాంపింగ్​కు అనుమతి లేదు. యూఎస్​ కాన్సులేట్​లలో రెన్యూ చేయించుకోవాలి. దేశం నుంచి బయటకు వెళ్లే హెచ్​-1బీ వీసాదారులు.. వీసాను రెన్యూ చేయించుకునే సమయంలో పాస్​పోర్టులపై సంబంధిత (రెన్యూ చేయించుకుంటున్న) డేట్​ను స్టాంప్ వేయించుకోవాల్సిన పరిస్థితి నెలకొంది.​

ఇప్పుడున్న ప్రక్రియ.. అటు విదేశీ ఉద్యోగులతో పాటు ఇటు అమెరికాలోని సంస్థలకు ఇబ్బందిగా మారింది. ముఖ్యంగా వీసా వెయిటింగ్​ పీరియడ్​ దాదాపు రెండేళ్లుగా ఉంటుండటం తలనొప్పి తెచ్చిపెట్టే విషయం.

హెచ్​-1బీ వీసా ఎంతో కీలకం..

H-1B Visa latest news : అమెరికాలోని కంపెనీలు.. విదేశీయులకు ఉద్యోగాలిస్తే, అక్కడి ప్రభుత్వం ఇచ్చే వీసానే ఈ హెచ్​-1బీ. యూఎస్​కు హెచ్​-1బీ వీసాదారులు చాలా కీలకం. ఎన్నో దశాబ్దాలుగా.. లక్షలాది మంది భారతీయులు, చైనీయులు.. ఈ హెచ్​-1బీ వీసా మీదే అమెరికాలో ఉద్యోగం చేయగలుగుతున్నారు.

"వీసా రీవాలిడేషన్​ ప్రక్రియను త్వరలోనే పైలట్​ ప్రాజెక్టు కింద ప్రారంభిస్తాము. ఎంత మంది వీసాదారులు దీనికి అర్హులు అన్నది ఇప్పుడే చెప్పలేము. కానీ.. ముందు చిన్న మొత్తంతో మొదలుపెట్టి, రానున్న 1-2ఏళ్లల్లో పూర్తిస్థాయికి తీసుకెళతాము," అని అమెరికా విదేశాంగశాఖ ప్రతినిధి తెలిపారు.

H-1B Visa status : వీసా ప్రక్రియను మరింత సులభతరం చేసేందుకు.. గత కొన్ని నెలలుగా అనేక చర్యలు చేపట్టింది అధ్యక్షుడు జో బైడెన్​ ప్రభుత్వం. ఇవి ఎందరో విదేశీయులకు ఉపమనాన్ని కలిగిస్తున్నాయి.

IPL_Entry_Point

సంబంధిత కథనం